تحریک انصاف نے ضلع راولپنڈی سے امید وار فائنل کرلئے

  راولپنڈی ... تحریک انصاف نے ضلع راولپنڈی میں قومی اسمبلی کی 7اور صوبائی اسمبلی کے11حلقوں پرامیدواروں کو حتمی شکل دے دی ۔ تحریک انساف کی حتمی منظوری کے بعد امیدواروں کاباضابطہ اعلان کیا جائے گا ۔ذرائع کے مطابق تحریک انصاف کے پارلیمانی بورڈ نے قومی اسمبلی کے حلقہ این اے 57مری سے مرتضیٰ ستی ،این اے 58گوجرخان سے چوہدری عظیم ، این اے 59سے سرور خان ،این اے 60شیخ رشید احمد، این اے 61عمران خان، این اے 62شیخ رشیداوراین اے63ٹیکسلا سے سرور خان کے ناموں کی منظوری دی ہے ۔ صوبائی حلقہ پی پی 10سے چوہدری افضل ،پی پی 11سے عارف عباسی ، پی پی 12سے سابق تحصیل ناظم حامد نواز راجہ ،پی پی 13سے حاجی امجد،پی پی 14آصف محمود ،پی پی15ڈاکٹر شہزاد وسیم ،پی پی 16سے اعجاز خان جازی اورپی پی 18سے راشد حفیظ کے ناموں پر اتفاق کیا گیا ۔صوبائی حلقہ پی پی 17سے ساجد قریشی اور چوہدری اصغر پر مشتمل 2امیدوار حتمی طور پرشارٹ لسٹ کئے گئے ۔ راولپنڈی شہر میں تحریک انصاف کے2سابق اراکین صوبائی اسمبلی اعجاز خان جازی اور راشد حفیظ نے حالیہ حلقہ بندیوں کے بعد صوبائی اسمبلی کی نشست پی پی16سے پارٹی کو ٹکٹ کے لئے درخواستیں جمع کرائی تھیں ۔ تحریک انصاف کے ذرائع کے مطابق دونوں امیدوار اسی حلقے سے الیکشن لڑنے پر بضد تھے ۔ انہی 2حلقوں کے لئے تحریک انصاف کے پاس ن لیگ سے حال ہی میں شامل ہونے والے سابق رکن صوبائی اسمبلی شہر یار ریاض اورموہڑہ شریف کے سجادہ نشین صاحبزادہ عمر فارق گل نے بھی پارٹی ٹکٹ کے لئے درخواستیں جمع کرا رکھی تھیں ۔ تحریک انصاف کی قیادت نے راولپنڈی شہر سے منتخب چاروں اراکین صوبائی اسمبلی کو حلقوںمیں ٹکٹ جاری کرنے کا فیصلہ کر لیا ۔ حتمی منظوری عمران خان دیں گے ۔

مزید پڑھیں:تحریک انصاف کا دوست محمد کھوسہ کو لینے سے انکار