ن لیگ کا بڑا سیاسی نقصان‘ 5 امیدوار دھوکا دے گئے
راجن پور: جنوبی پنجاب میں آئندہ ماہ ہونے والے انتخابات کے لیے ن لیگ سے ٹکٹ لے کر الیکشن لڑنے والے 5 امیدواروں نے پارٹی کو ٹکٹ واپس کردیئے جسے ماہرین ن لیگ کے لیے ایک بڑا سیاسی نقصان قرار دے رہے ہیں۔ ذرائع کے مطابق پانچوں امیدواروں نے الیکشن کمیشن کے ریٹرننگ افسران کو جمع کرائی گئی ٹکٹیں واپس کرکے اپنا انتخابی نشان جیپ الاٹ کرا لیا ہے۔ حلقہ این اے 193 اور پی پی 293 سے سابق ڈپٹی اسپیکر پنجاب اسمبلی شیر علی گورچانی بھی ٹکٹ واپس کرنے والوں میں شامل ہیں۔ ادھر صوبائی اسمبلی کے حلقہ پی پی 294 سے شیر علی گورچانی کے والد پرویز گورچانی نے بھی اپنا ٹکٹ مسلم لیگ ن کو واپس کردیا۔ قومی اسمبلی کے حلقہ این اے 194 سے امیدوار حفیظ الرحمن دریشک اور صوبائی اسمبلی کے حلقہ پی پی 296 سے یوسف دریشک نے بھی ٹکٹ واپس کرنے کا فیصلہ کرتے ہوئے آزاد حیثیت سے انتخابی میدان میں اترنے کا اعلان کیا۔
