زرداری کو مفرور قرار دینے کی خبر جھوٹی ہے ،پیپلزپارٹی
اسلام آباد...سابق صدر اور پیپلزپارٹی پارلیمنٹیرینز کے صدر آصف علی زرداری کے ترجمان نے ایک بیان میں کہا ہے کہ ایف آئی اے کی جانب سے چالان پیش کئے جانے اور آصف علی زرداری کو مفرور قرار دئیے جانے کی خبر جھوٹ، بدنیتی اور انہیں سیاسی طور پر نقصان پہنچانے کی ایک سازش ہے۔ سچ یہ ہے کہ ایف آئی اے کے ڈائیریکٹر جنرل بشیر میمن پیپلزپارٹی اور اس کی قیادت کے دشمن ہیں ان کا بھائی جی ڈی اے کی جانب سے سندھ میں انتخابات لڑ رہا ہے۔ بشیر میمن چاہتا ہے کہ وہ ان انتخابات پر اپنے عہدے کو استعمال کرتے ہوئے اثرانداز ہو اور اپنے بھائی کو فائدہ پہنچائے۔ پیپلزپارٹی نے متعدد مرتبہ یہ مطالبہ کیا کہ بشیر میمن کو اس کے عہدے سے ہٹایا جائے تاکہ انتخابات آزادانہ، منصفانہ اور شفاف ہو سکیں۔ ترجمان نے یہ بھی کہا کہ ایف آئی اے کے ایڈیشنل ڈائریکٹر جنرل نجف قلی مرزا وہ افسر ہیں جو آصف علی زرداری پر تشدد اور ان کی زبان کاٹے جانے میں ملوث ہیں۔ آصف علی زرداری نے نجف مرزا کے خلاف ایک مقدمہ بھی دائر کیا ہوا ہے۔ مذکورہ کیس کی اس رپورٹ میں جو سپریم کورٹ میں پیش کی گئی آصف علی زرداری کا نام ملزمان کی فہرست میں شامل نہیں۔ ٹی وی چینلوں پر چلائی جانے والی خبروں میں کوئی صداقت نہیں کہ آصف علی زرداری کو اشتہاری قرار دیا گیا ۔ یہ خبریں بدنیتی پر مبنی ہیں ان کا مقصد آصف علی زرداری کو سیاسی طور پر نقصان پہنچانا ہے۔
