مشکل کردار پہلی ترجیح ہیں ، ماریہ واسطی

اداکارہ ماریہ واسطی نے کہا ہے کہ مشکل کردار میری پہلی ترجیح ہوتے ہیں کیونکہ کسی اداکار کی صلاحیتیں اسی وقت کھل کر سامنے آتی ہیں جب اسے مشکل کردار دیا جاتا ہے ۔ انہوں نے خصوصی گفتگو کرتے ہوئے کہا کہ میری خوش قسمتی تھی کہ میں نے اپنے فنی کریئر کا آغاز پی ٹی وی لاہور سینٹر سے کیا جہاں مجھے ایوب خاور ، یاور حیات اور دیگر بڑے ناموں کے ساتھ کام کرنے کا موقع ملا اور ان لوگوں نے ہی میری صلاحیتوں کو اجاگر کیا ۔ انہوں نے کہا کہ ٹیلی فلم ”کلو “،ڈرامہ سیریل ”ملکہ عالیہ “ اور ”کلموئی “ جیسے ڈراموں نے مجھے ملک گیر شہرت دی اور ان سب ڈراموں میں مجھے چیلنجنگ کردار ادا کرنے پڑے جو میں نے بخوبی ادا کئے۔ انہوں نے کہا کہ کامیابیوں کے تسلسل کو برقرار رکھنا بہت مشکل کام ہے ۔ مداح آپ کو جس جگہ دیکھ چکے ہوتے ہیں، دوبارہ اس سے اوپر دیکھنا پسند کرتے ہیں اور میری کوشش ہوتی ہے کہ میں اپنے مداحوں کے معیار پر پورا اتروں ۔