ہاکی ایشین گیمز:پاکستانی کھلاڑیوں نے انفرادی کھیل کھیلا،رپورٹ

کراچی:ایشین گیمزمیں پاکستان ہاکی ٹیم کی ناقص کارکردگی کے حوالے سے ہالینڈ سے تعلق رکھنے والے ہیڈکوچ رولینٹ اولٹمنز نے اپنی رپورٹ پی ایچ ایف کوجمع کرا دی۔ خطیرمشاہرے پر خدمات انجام دینے والے غیرملکی کوچ نے رپورٹ میں پاکستان ہاکی ٹیم کی ایشین گیمزمیں عبرتناک شکست کی وجوہ اور توجیہہ بیان کی ہیں۔ ان میں مخصوص حالات میں ٹیم گیم کے بجائے انفرادی کھیل اپنانا، کھلاڑیوں کی فزیکل فٹنس میں کمی اور ملنے والے مواقع سے گول نہ کر کے کامیابی کے امکانات کوکھونا بھی شامل ہے۔ ڈچ کوچ نے اپنی رپورٹ میں موقف اپنایاکہ انڈونیشیا میں منعقدہ ایشین گیمزکے ہاکی ایونٹ میں پاکستان کے کھلاڑی دوران میچز خاص گیم حالات میں ٹیم گیم کا مظاہرہ کرنے کے بجائے انفرادی کھیل کا مظاہرہ کرتے رہے۔ ٹیم میں کمبی نیشن کا فقدان ہوا۔ پاکستان ہاکی ٹیم نے7 میچز میں46 گول اسکور کئے، میچز میں پاکستان کو مجموعی طور پر 48 پنالٹی کارنرز حاصل ہوئے تاہم بدقسمتی سے ان میں سے صرف 17 پنالٹی کارنرز سے فائدہ اٹھاتے ہوئے گول اسکورکئے جبکہ 31 پنالٹی کارنرز ضائع کردئیے گئے جس کی بناء پرپنالٹی کارنر پرگول کرنے کی شرح 35 فیصد رہی، تاہم یہ امر قابل ذکرہے کہ کامن ویلتھ گیمزکے مقابلے میں ایشین گیمزمیں پنالٹی کارنر پرگول کرنے کی شرح بڑھی۔ اولٹمنز نے اپنی رپورٹ میں لکھا ہے کہ اہم میچز میں گول کرنے کی شرح کم ہوکر صرف 14 فیصد رہ گئی جو کہ اس سطح پر قومی ہاکی ٹیم کیلئے ناکافی ہے، ڈچ کوچ کی رپورٹ کے مطابق پاکستانی فارورڈز نے گول کرنے کے 133 مواقع پیدا کئے جبکہ صرف 27 مواقعوں پرگول کرسکے جو کہ کل مواقعوں کا 20 فیصد ہے جبکہ جاپان کیخلاف سیمی فائنل میں ناکامی سے دوچار ہونے والی پاکستان ہاکی ٹیم کو 9 مواقع ملے جبکہ ہندکے خلاف اہم میچ میں گرین شرٹس کو12 مواقع ملے جس سے بدقسمتی سے فائدہ نہ اٹھایاجاسکا۔ماضی میں ہندوستانی ہاکی ٹیم کی کوچنگ کرنے والے اولٹمنز نے مستقبل میں بہتر نتائج کے لئے اپنی بعض سفارشات بھی پیش کی ہیں جن میں کھلاڑیوں کی فٹنس کو بہتر بنانے کی اشد ضرورت پرزوردیا گیا ہے۔ واضح رہے کہ پاکستان ہاکی ٹیم کے پول میں ورلڈ رینکنگ میں کمزور ترین ٹیمیں شامل تھیں جن میں عالمی رینکنگ میں 86 ویں نمبر والی ٹیم قازقستان کو پاکستان نے 16 گول سے شکست دی، عالمی رینکنگ میں 47 ویں نمبر والی ٹیم تھائی لینڈ کو پاکستان نے10 گول سے ہرایا اور عالمی رینکنگ میں 33 ویں پوزیشن کی حامل عمان کی سائیڈکو پاکستان نے10 گول سے زیر کیا لیکن پاکستان کو عالمی رینکنگ میں 16 ویں نمبر کی ٹیم جاپان کے ہاتھوں1-2کی حیرتناک ناکامی کا سامنا رہا۔بعدازاں عالمی رینکنگ میں 13 ویں پوزیشن پر موجود پاکستان کو 8 ٹیموں کے ایونٹ میں چھٹی پوزیشن پر قناعت کرنا پڑا۔

کھیلوں کی مزید خبریں پڑھنے کیلئے اردونیوز " واٹس ایپ اسپورٹس گروپ" جوائن کریں