قلات میں سرچ آپریشن،4دہشت گرد ہلاک،2 اہلکار جاں بحق

راولپنڈی ...بلوچستان کے ضلع قلات میں سیکیورٹی فورسز کے سرچ آپریشن کے دوران2 اہلکار جاں بحق جبکہ 4 دہشت گرد ہلاک ہوگئے۔ آئی ایس پی آر کے مطابق دہشت گردوں کی موجودگی کی خفیہ اطلاع پر کارروائی کی گئی۔ دہشت گرد صوبے میں دہشت گردی کی بڑی کارروائیوں کی منصوبہ بندی کر رہے تھے۔قلات میں منگھوچر کے علاقے میں دہشت گردوں سے فائرنگ کے تبادلے میں ہلاکتیں ہوئیں۔2اہلکار زخمی بھی ہوئے۔ انہیں اسپتال منتقل کردیا گیا ۔جاں بحق اہلکاروں میں سپاہی وارث سبحان کا تعلق پنجاب کے ضلع جھنگ اور میرعالم کا تعلق گلگت بلتستان کے ضلع غذر سے تھا۔کارروائی کے دوران دہشت گردوں کے ٹھکانے سے 2 خود کش جیکٹس کے علاوہ بڑی تعداد میں بارودی مواد اور اسلحہ برآمد ہوا ۔