پاک،چین مشترکہ فضائی مشقیں

اسلام آباد... پاک ،چین مشترکہ فضائی مشق پاک فضائیہ کے آپریشنل ائیر بیس پر شروع ہوگئی۔اس مشق میں شریک چینی فضائیہ کا دستہ پائلٹس، ائیر ڈیفنس کنٹرولرز اور تکنیکی عملے کے ساتھ فائٹر، بمبار اور اواکس طیاروں پر مشتمل ہے۔پاک فضائیہ اپنی فضائی اور زمینی عملے کی آپریشنل تربیت کے لئے با قاعدگی سے اندرون اور بیرونِ ملک دوست ممالک کے ساتھ اسطرح کی مشقوں کا انعقاد کرتی ہے ۔فضائی مشق شاہین ہر سال دونوں ملکوں میں باری باری ہوتی ہیں۔ یہ اس سلسلے کی ساتویں مشق ہے گزشتہ سال چین کے آپریشنل ائیر بیس پر ہونے والی مشقوں میں پاک فضائیہ کے دستے نے شمولیت کی تھی۔پاکستان اور چین کے درمیان قریبی تعلقات ہیں دونوں ممالک کی دفاعی افواج دفاع اور سیکیورٹی میں ایک دوسرے کے ساتھ بھرپور تعاون کرتی ہیں ۔پاک چین اقتصادی راہداری اورمشترکہ فوجی مشقوں سے دونوں ممالک کے درمیان تعلقات مزید مضبوط ہوئے ہیں۔