افغانستان میں داعش کی موجودگی پاکستان کیلئے خطرہ ہے، تہمینہ جنجوعہ

اسلام آباد...سیکریٹری خارجہ تہمینہ جنجوعہ نے کہاہے کہ افغانستان میں داعش کی موجودگی پاکستان کےلئے مستقل خطرہ ہے۔ منگل کو تقریب سے خطاب کے دوران سیکریٹری خارجہ نے کہا کہ پاکستان تمام اہم طاقتوں سے رابطے میں ہے ،پاکستان اور چین کے تعلقات ایک مثال ہیں۔ چین وہ ملک ہے جس سے پاکستان ہر مسئلے پر بات کرتا ہے۔ وزیر اعظم عمران خان کے دورے سے ان تعلقات کو نئی جہت ملی ہے۔سیکریٹری خارجہ نے کہا کہ سی پیک اور چینی سرمایہ کاری سے گزشتہ کچھ برسوں میں پاکستان کی معاشی حالت میں بہتری آئی ہے۔پوری دنیا اب چینی صدر کے ون بیلٹ ون روڈ کے وژن کی قائل ہو رہی ہے۔ انہوں نے کہا کہ افغانستان کے مسئلے کا حل لازمی ہے۔افغانستان میں داعش کی موجودگی پاکستان کےلئے مستقل خطرہ ہے۔علاقائی اور عالمی طاقتوں کو افغان مسئلے کے حل کا ادراک ہو گیا ۔ اس حوالے سے ہونے والی تمام کوششوں کو سراہتے ہیں۔ افغان حکومت اور افغان طالبان کے درمیان مذاکرات کی بھی حمایت کرتے ہیں۔ انہوں نے کہا کہ ہند نے سارک تنظیم کو یرغمال بنا رکھا ہے۔ ہند ہی سارک سربراہ اجلاس کے راستے میں رکاوٹ ہے۔انہوںنے کہا کہ پاکستان مسئلہ کشمیر سمیت تمام تنازعات پر بات چیت کےلئے تیار ہے۔ خطے میں امن کی خاطر وزیر اعظم نے ہند کے ایک قدم کے جواب میں دو قدم آگے بڑھنے کی بات کی۔ وزیر اعظم نے اپنے خط میں مذاکرات بحالی کی تجویز دی۔ پاک ، ہند وزرائے خارجہ کی نیو یارک میں ملاقات طے کرنے کے بعد ہند نے منسوخ کی۔