60سے70سیاستدانوں کو آوٹ کرنے کی سازش؟
اسلام آباد....نیشنل پارٹی کے سربراہ سینیٹر حاصل بزنجو نے کہا ہے کہ نیب کو استعمال کرتے ہوئے 60سے70سیاستدانوں کو سیاست سے نکالنے کی سازش کی جا رہی ہے۔ نواز شریف کے خلاف احتساب عدالت کا فیصلہ انتہائی کمزور ہے جس سے عدالتوں کے وقار پر حرف آئےگا۔پیرکو نوازشریف کے خلاف فیصلے پر بزنجو نے کہا کہ نواز شریف کے خلاف احتساب عدالت نے انتہائی کمزور فیصلہ دیا ہے جس سے عدالتوں کے وقار پر حرف آئے گا۔اس سے قبل بھی ہائی کورٹ نواز شریف کے خلاف ایک کمزور فیصلہ معطل کر چکی ہے۔نیب نواز شریف کے خلاف کرپشن اور منی لانڈرنگ کے الزامات ثابت نہیں کر سکا۔ ایسا لگ رہا ہے جیسے ججز سے جبر اور زبردستی فیصلے کرائے جا رہے ہیں۔ایسی خبریں بھی آ رہی ہیں کہ اگلے2سال میں نیب کو استعمال کرتے ہوئے 60سے70سیاستدانوں کو سیاست سے نکالا جائے گا۔ ان پر جھوٹے مقدمات بنائے جائیں گے۔ انہوںنے کہاکہ ماضی میں بھی جنرل ایوب، جنرل یحییٰ اور مشرف نے سیاستدانوں کو سائیڈ لائن کرنے کی کوشش کی جس میں ا نہیں ناکامی کا سامنا کرنا پڑا۔ اس مرتبہ بھی نادیدہ قوتیں اپنے عزائم میں ناکام ہوںگی۔نوازشریف کے خلاف فیصلے سے ملک کمزور ہوگا۔نیب کا نوازشریف کے خلاف فیصلہ کہیں اور سے بن کر آیا ہے جسے جج نے پڑھ کر سنایا ۔انہوںنے کہاکہ ایک مخصوص طبقہ سیاستدانوں کو ختم کرنے کیلئے سرگرم ہے جس میں انہیں ناکامی ہوگی۔
