سب سے زیادہ غیر قانونی تارکین کہاں ہلاک ہوئے؟

نیویارک...گزشتہ کئی برسوں سے دنیا بھر میں سب سے زیادہ غیر قانونی تارکین وطن بحیرہ روم میں ڈوب کر ہلاک ہوئے۔ اقوام متحدہ کے ادارہ برائے پناہ گزین کے تازہ اعداد و شمارمیں بتایاگیاکہ یورپ پہنچنے کی کوشش میں گزشتہ برس کم از کم 2262 پناہ گزین بحیرہ روم میں ڈوب کر ہلاک ہو گئے۔2017 کے مقابلے میں یہ ہلاکتیں کم ہیں۔ اس سال ہلاک یا لاپتہ ہو جانے والے پناہ گزینوں کی تعداد 3139 تھی تاہم ان جان لیوا حادثات کے باوجود بھی تارکین وطن کی جانب سے کشتیوں کے ذریعے یورپ پہنچنے کی کوششیں جاری ہیں۔ 2018 میں مجموعی طور پر دنیا کے مختلف ممالک سے ایک لاکھ13ہزار 482 پناہ گزین یورپ کے مختلف ممالک تک پہنچنے میں کامیاب رہے۔یواین ایچ سی آر کی ترجمان کے مطابق تارکین کی اب پسندیدہ ترین منزل یورپ کا دروازہ سمجھا جانے والا ملک اسپین ہے۔گزشتہ برس شمالی افریقہ کا راستہ اختیار کرتے ہوئے55 ہزار سے زائد تارکین وطن اس ملک پہنچے۔دوسری جانب اٹلی کی نئی حکومت نے انتہائی سخت اقدامات اٹھائے ہیں یہی وجہ ہے کہ 2017 کے مقابلے میں گزشتہ برس اطالوی سرزمین تک پہنچنے والے پناہ گزینوں کی تعداد23 ہزار سے کچھ زائد رہی۔ 2017 میں لیبیا کے راستے اٹلی پہنچنے والے غیرقانونی تارکین وطن یہ تعداد ایک لاکھ19 ہزار سے بھی زائد تھی۔مجموعی طور پر 2015 کے مقابلے میں یورپ پہنچنے والے تارکین وطن کی تعداد میں کمی آتی جا رہی ہے۔