اسلام آباد: وزیر ریلوے شیخ رشید احمد نے کہا ہے کہ یہ وزیر اعظم عمران خان ہی کی ہمت ہے کہ وہ برے حالات میں دوست ممالک کی مدد سے ملکی معیشت بہتر کررہے ہیں، گزشتہ 10 برس میں ملکی خزانے کو تباہ و برباد کردیا گیا جبکہ نواز شریف اور آصف زرداری ڈیل ملنے میں ناکای کے بعد اب ڈھیل چاہتے ہیں۔
اسلام آباد میں پریس کانفرنس کرتے ہوئے شیخ رشید نے مزید کہا کہ شہباز شریف کے پبلک اکاؤنٹس کمیٹی (پی اے سی) کا چیئرمین بننے کے خلاف عدالت جاؤں گا اور اگر سپریم کورٹ میں بھی کیس ہار گیا تو بھی کمیٹی میں ضرور بیٹھوں گا۔ انہوں نے کہا کہ ریمانڈ کے دوران پروڈکشن آرڈر جاری کرنا غیر قانونی و غیر آئینی ہے۔ جس شخص پر خود کیسز ہوں وہ کسی دوسرے کا احتساب کیسے کر سکتا ہے۔ انہوں نے کہا کہ شہباز شریف کا آڈٹ میں کروں گا۔
ٹرینوں کے نظام پر بات کرتے ہوئے شیخ رشید نے کہا کہ 12 فروری تک ٹرینوں میں ٹریکنگ سسٹم لگا دیا جائے گا۔ علاوہ ازیں جلد ہی تھل ایکسپریس شروع کرنے جا رہے ہیں۔ انہوں نے کہا کہ رواں برس قوم سے 20 ٹرینیں چلانے کا کیا گیا وعدہ پورا کریں گے۔ 3 ٹرینوں کا کرایہ پشاور تا کراچی 1350 روپے ہے۔ ایم ایل ون اور نالہ لئی بڑے منصوبے ہیں وہ پورے کرنے ہیں اور کوشش ہے کہ ریل کی رفتار 160 سے 220 کلو میٹر تک ہوجائے۔
