قتل کے الزام میں مصری فنکارہ گرفتار

مشہور مصری فنکارہ کو شوہر کے قتل کرنے کے الزام میں گرفتار کیا گیا ہے۔ پولیس نے عدالت سے ریمانڈ حاصل کر کے فنکارہ کو تحقیقاتی سینٹر منتقل کیا۔

العربیہ نیوز کے مطابق مصر کی معروف فنکارہ ’عبیر بیبرس‘ پر الزام ہے کہ انہوں نے شوہر کو قتل کیا۔ واقعے کی اطلاع پڑوسیوں نے پولیس کو دی تھی۔

پڑوسیوں نے پولیس کو ٹیلی فون پر بتایا کہ فنکارہ کے گھر سے جھگڑنے کی آوازیں آ رہی تھی جو یک دم کسی کی چیخ سے ساتھ بند ہوگئیں۔

پولیس کو دی جانے والی اطلاع میں شک ظاہر کیا گیا تھا کہ فنکارہ کے گھر میں جھگڑے کے بعد مکمل خاموشی سے لگتا ہے کہ فریقین میں سے کوئی ایک ہلاک ہو گیا۔

اطلاع ملتے ہی پولیس فوری طور پرفنکارہ کے فلیٹ میں پہنچ گئی جہاں ایک شخص خون میں لت پت پڑا تھا جائزہ لینے پر معلوم ہوا کہ وہ مر چکا ہے ۔

پولیس کا کہنا تھا کہ فنکارہ نے ابتدائی بیان میں شوہر کوقتل کرنے کا اعتراف کرتے ہوئے کہا کہ ان کے درمیان کسی بات پر جھگڑا ہو گیا تھا۔ شوہر نے تھپڑ مارا جس پر طیش میں آ کر شیشے کے گلدان سے حملہ کیا۔ ملزمہ کا کہنا تھا کہ گلدان شوہر کے سینے میں پیوست ہو گیا جس سے وہ فوری طور پر ہلاک ہو گیا ۔

ملزمہ کا کہنا تھا کہ شوہر سے جھگڑا روز مرہ کا معمول تھا کوئی دن ایسا نہیں گزرا جب کوئی نہ کوئی جھگڑا نہ ہوا ہو اس سے تنگ آچکی تھی وقوعہ والے روز شوہر نے جب تھپڑ مارا تو میں اپنی توہین برداشت نہ کر سکی۔

پولیس نے عدالت سے 15 روزہ تحقیقاتی ریمانڈ حاصل کرکے ملزمہ کو گرفتار کر لیا جبکہ نعش کو پوسٹ مارٹم کے لیے بھیج دیا گیا۔

واضح رہے کہ عبیر بیبرس 2014 میں فلمی دنیا آئیں۔ انہوں نے معروف مصری کومیڈی سیریل ’ السع وفلسع ‘ پہلی بار کام کیا۔ اس کے بعد ان پر دنیائے فن کے دروازے کھلتے چلے گئے۔