کورونا سے ہلاکتوں میں اضافے کے بعد تہران میں مساجد بند

ایران کی حکومت نے کورونا وائرس سے ہونے والی ہلاکتوں میں ایک بار پھر اضافے کے بعد دارالحکومت تہران میں لاک ڈاؤن دوبارہ نافذ کر دیا ہے اور ساتھ ہی مساجد بھی بند کر دی ہیں۔

عرب نیوز نے ریڈیو فردا کے حوالے سے کہا ہے کہ تہران میں لاک ڈاؤن کا دوبارہ نفاذ روزانہ کیسز اور اموات میں اضافے کے سبب کیا گیا ہے۔

حالیہ دنوں میں ایران میں وائرس سے روزانہ اموات کی تعداد دو سو تک پہنچ گئی ہے۔

اموات میں اضافے نے ایران کی حکومت کو وائرس کے پھیلاؤ پر قابو پانے کے لیے نئی حکمت عملی اختیار کرنے پر مجبور کر دیا ہے۔

تہران میں قائم کورونا سے نمٹنے کے مرکزی سنٹر کے سربراہ علی رضا زالی نے بتایا کہ گزشتہ دو دنوں میں 890 کورونا متاثرین کو ہسپتالوں میں داخل کیا گیا۔

مساجد کے علاہ تہران میں جم اور سوئمنگ پولز بھی بند کر دیے گئے ہیں۔

حکام نے وائرس کے دوبارہ پھیلاؤ کے باعث سکول میں داخلے کے لیے ٹیسٹ اور امتحانات بھی ملتوی کر دیے ہیں۔