بھاپ کے ذریعے بنائے گئے فن پارے وائرل

 سعودی عرب کے نوجوان نے بھاپ کے ذریعے فن پارے تیار کرنے کا اچھوتا انداز متعارف کرایا ہے۔

العربیہ نیٹ کے مطابق عبدالرحمان عبدالکریم نامی نوجوان نے بھاپ کے ذریعے بنایا گیا ایک فن پارہ سوشل میڈیا پر شیئر کیا جو وائرل ہوگیا۔  

عبدالرحمان نے گاڑی کے شیشے پر معروف سعودی گلوکار محمد عبدو اور کئی مشہور شخصیات کے پورٹریٹ بنائے ہیں۔ سوشل میڈیا صارفین اس پر پسندیدگی کا اظہار کر رہے ہیں۔

عبدالرحمان کو بچپن ہی سے پینٹنگ کا شوق ہے۔ بھاپ کے ذریعے شیشے پر پورٹریٹ تیار کرنے کا نہ صرف  فیصلہ کیا بلکہ اس پر عمل بھی کر کے دکھایا۔

عبدالرحمان ایک دن ریستوران میں اپنی باری کے انتظار میں تھے۔ پہلے کیشیئر کی جانب سے دیے گئے بل پر پینٹنگ کی کوشش کی، پھر چائے کے کپ سے نکلنے والی گرم بھاپ کی مدد سے گاڑی کے شیشے پر پینٹنگ کا تجربہ کیا۔ ابہا شہر میں ٹھنڈی ہواؤں کے دوران بھاپ کا ماحول خود بخود بن جاتا ہے۔

عبدالرحمان عبدالکریم نے سب سے پہلے عرب دنیا کی ملکہ ترنم ام کلثوم کا پورٹریٹ بھاپ کے ذریعے گلاس پر بنا کر جاری کیا، پھر کئی فن کاروں کے پوٹریٹ بھی اسی انداز میں بنائے اور سوشل میڈیا پر شیئر کیے۔

عبدالرحمان نے العربیہ نیٹ سے گفتگو میں کہا کہ جب گاڑی کا شیشہ بند ہوتا ہے اور موسم سرد ہوتا ہے تو گاڑی کے اندر بھاپ پیدا ہوجاتی ہے۔ گرم چائے کا کپ گلاس کے پاس رکھ کر بھاپ کی مدد سے پورٹریٹ بناتا ہوں۔ طریقہ کار یہ ہے کہ چائے کا کپ چلا کر لکڑی کی مدد سے پورٹریٹ بنایا جاتا ہے۔

عبدالرحمان نے بتایا کہ انہوں نے بھاپ پینٹنگ کا طریقہ کسی سے نہیں سیکھا بلکہ یہ طریقہ خود ایجاد کیا ہے۔

 عبدالرحمان کی بھاپ پینٹنگز کو سوشل میڈیا پر غیرمعمولی پذیرائی مل رہی ہے۔