مہندر سنگھ دھونی کرکٹ سے ریٹائر

انڈین کرکٹ ٹیم کے سابق کپتان مہندر سنگھ دھونی نے کرکٹ کے تمام فارمیٹس سے ریٹائرمنٹ کا اعلان کیا ہے۔

انڈین نیوز چینل این ڈی ٹی وی کے مطابق مہندر سنگھ دھونی نے یہ اعلان سنیچر کو کیا اور اس طرح ان کے 15 سالہ کرکٹ کیریئر کا اختتام ہو گیا ہے۔

واضح رہے کہ اس سے قبل دھونی کی ریٹائرمنٹ کے حوالے سے مختلف قیاس آرائیاں کی جا رہی تھیں۔

اے ایف پی کے مطابق چند روز پہلے انڈین پریمیئر لیگ کی فیورٹ ٹیم چنئی سپر کنگز کے چیف ایگزیکٹیو نے توقع ظاہر کی تھی کہ سابق کپتان مہندر سنگھ دھونی اپنی 40 ویں سالگرہ کے بعد بھی کرکٹ کھیلتے رہیں گے۔

ایم ایس دھونی کو انڈیا میں ایک غیر معمولی کرکٹر کے طور پر پذیرائی حاصل ہے اور ان کی ریٹائرمنٹ کے حوالے سے کوئی بھی خبر مداحوں میں بے چینی پھیلاتی ہے۔ دھونی بیٹسمین ہونے کے ساتھ ساتھ ایک بہترین وکٹ کیپر بھی تھے۔

دھونی گذشتہ برس ورلڈ کپ کے سیمی فائنل میں انڈیا کی شکست کے بعد کوئی میچ نہیں کھیلے۔

مہندر سنگھ دھونی نے 2014 میں ٹیسٹ کرکٹ سے ریٹائرمنٹ کا اعلان کیا تھا۔ انہوں نے اپنے کیریئر میں 350 ایک روزہ اور 98 ٹی 20 میچز کھیلے۔

ایک روزہ میچوں میں انہوں نے 10 ہزار 773 رنز بنائے، 10 سنچریاں اور 73 نصف سنچریاں بنائیں۔

اگر ٹی 20 کرکٹ کی بات کی جائے تو انہوں نے 98 میچوں میں 1617 رنز بنائے اور دو نصف سنچریاں سکور کیں۔

مہندر سنگھ دھونی جنوری 2019 میں 10 ہزار رنز سکور کر کے انڈیا کے پانچویں اور دنیا میں ایک روزہ کرکٹ میں 12 ویں کھلاڑی قرار پائے۔

دھونی کا شمار سچن ٹنڈولکر، راہل ڈریوڈ، سارو گنگولی، کمارا سنگاکارا، برائن لارا اور سنتھ جے سوریا جیسے کھلاڑیوں میں کیا جاتا ہے۔

2011 کا ورلڈ کپ جیتنے والے کپتان دھونی دوسرے وکٹ کیپر بیٹسمین ہیں جنہوں نے 10 ہزار رنز بنائے۔ ان سے قبل سری لنکا کے کمارا سنگاکارا نے یہ اعزاز حاصل کیا تھا۔