گذشتہ 24 گھنٹوں میں 720 افراد صحت یاب ہوئے ہیں۔ (فوٹو سبق)
سعودی عرب میں کورونا وائرس کے نئے کیسز میں کمی کا سلسلہ جاری ہے۔ بدھ کو بھی 800 سے کم نئے مریض سامنے آئے ہیں۔
وزارت صحت کے مطابق بدھ 9 ستمبر کو گذشتہ چوبیس گھنٹوں کے دوران 775 نئے کیسز سامنے آئے۔ اس طرح متاثرین کی تعداد بڑھ کر 3 لاکھ 23 ہزار 12 ہو گئی ہے۔
سبق نیوز نے وزارت صحت کی جانب سے جاری اعداد و شمار کے حوالے سے بتایا کہ گذشتہ 24 گھنٹوں کے دوران 720 افراد صحت یاب ہوئے ہیں۔ اب تک 2 لاکھ 98 ہزار 966 افراد اس مرض سے شفایاب ہو چکے ہیں۔
اس وقت ایکٹیو کیسز کی تعداد 19 ہزار 881 ہے(فوٹو ایس پی اے)
وزارت صحت کا کہنا ہے کہ گذشتہ روز کورونا سے 28 افراد ہلاک ہوئے۔ اموات کی مجموعی تعداد چار ہزار 165 ہو چکی ہے۔
مملکت میں اس وقت ایکٹیو کیسز کی تعداد 19 ہزار 881 ہے جن میں سے ایک ہزار 386 مریض انتہائی نگہداشت یونٹ میں زیرعلاج ہیں۔
گذشتہ 24 گھنٹوں کے دوران مختلف شہروں میں کورونا وائرس کے نئے کیسز کی سب سے زیادہ تعداد دمام میں رہی جہاں 54 نئے مریض سامنے آئے ہیں۔
مکہ میں 51، جدہ 45، الھفوف 40، ریاض 40، مدینہ 37، ینبع 36،عرعر 33، ینبع 36، قطیف 30، المبرز 28، الظہران 21، حائل 19، رفحا 17 اور جازان میں 14 کیسز کا پتا چلا ہے۔
وبا کو پھیلنے سے روکنے کے لیے حفاظتی اقدامات کا سلسلہ جاری ہے۔(فوٹو ایس پی اے)
اعداد و شمار کے مطابق 25 شہروں میں مریضوں کی تعداد ایک، ایک، 18 شہروں میں 2، 2 اور 13 شہروں میں 3،3 جبکہ 5 شہروں میں 4،4 افراد میں کورونا وائرس کی تصدیق ہوئی ہے۔
سعودی عرب میں متعدی امراض سے بچاؤ اور وبا کو پھیلنے سے روکنے کے لیے حفاظتی اقدامات کا سلسلہ جاری ہے۔
وزارت صحت کے ترجمان نے کہا ہے کہ پچھلے ایک ماہ سے کورونا کے کیسز میں مسلسل کمی آرہی ہے جبکہ پچھلے دس دنوں میں کورونا کے نئے کیسز کی تعداد ایک ہزار سے کم رہی ہے۔
ترجمان کا کہنا تھا کہ کورونا کے کیسز میں کمی کے حوالے سے اب تک تمام اشارے امید افزا ہیں۔
