پاکستان میں کورونا ویکسین کے ٹرائل کا آغاز

پاکستان میں کورونا وائرس کی ویکیسن کے تیسرے مرحلے کے ٹرائل کا آغاز ہو گیا ہے۔

وزیر منصوبہ بندی اور نیشنل کمانڈ اینڈ آپریشن سینٹر کے سربراہ اسد عمر نے ٹوئٹر پر کہا کہ ’ ابھی ابھی ویکیسن کے فیز تھری  کے ٹرائل کا افتتاح کیا۔‘

ان کے مطابق یہ ویکسین ایک چینی کمپنی نے بنائی ہے۔ اس کے ٹرائل میں سات ممالک کے چالیس ہزار افراد حصہ لیں گے جن میں سے آٹھ سے 10 ہزار پاکستانی ہوں گے۔ ابتدائی نتائج چار سے چھ مہینے میں آئیں گے۔

پاکستان میں گزشتہ 24 گھنٹوں کے دوران کورونا کے مزید 582  مریض سامنے آئے ہیں جس کے بعد ملک میں اب تک وائرس سے متاثر ہونے والوں کی تعداد تین لاکھ چھ ہزار 886 ہوگئی ہے۔

منگل کی صبح نیشنل کمانڈ اینڈ آپریشن سینٹر کی جانب سے جاری اعداد و شمار کے مطابق گزشتہ 24  گھنٹوں کے دوران چار افراد کورونا کے سبب ہلاک ہو گئے۔

ملک میں اس وقت کل ایکٹیو کیسز کی تعداد سات ہزار 303  ہے۔

اب تک پاکستان میں دو لاکھ 93 ہزار 159 افراد کورونا کا شکار ہونے کے بعد صحت یاب ہو چکے ہیں۔

پیر 21 ستمبر کو ملک میں کورونا کے 36 ہزار 155 ٹیسٹ کیے گئے۔ اس وقت بلوچستان اور پاکستان کے زیر انتظام کشمیر میں کورونا کا کوئی مریض ونٹی لیٹر پر نہیں ہے۔

ملک میں کورونا کے مریضوں کے لیے مختص ایک ہزار 912 ونٹی لیٹرز میں سے صرف 106 پر مریض موجود ہیں۔

کورونا سے سب سے زیادہ متاثرہ صوبہ سندھ ہے جہاں اب تک ایک لاکھ 34 ہزار 243 افراد اس بیماری سے متاثر ہوئے ہیں جب کہ پنجاب میں 98 ہزار 487 افراد متاثر ہوئے ہیں۔

پاکستان کے زیر انتظام کشمیر میں دو ہزار 550، بلوچستان میں 14 ہزار 499، گلگت بلتستان میں تین ہزار 513،اسلام آباد میں 16 ہزار 207، اور خیبر پختونخوا میں 37 ہزار 387 افراد متاثر ہوئے ہیں۔

ملک میں کورونا سے اب تک چھ ہزار 424  افراد ہلاک ہو چکے ہیں۔ سب سے زیادہ ہلاکتیں سندھ میں ہوئی ہے جہاں دو ہزار 463 افراد کورونا کی وجہ سے لقمہ اجل بن گئے ہیں۔

 پنجاب میں دو ہزار 227، کے پی میں  ایک ہزار 258، اسلام آباد میں 180، بلوچستان میں 145، گلگت میں 82، اور پاکستان کے زیر انتظام کشمیر میں 69  افراد کورونا کے سبب ہلاک ہو چکے ہیں۔