کورونا ویکسین کی پہلی کھیپ سعودی عرب پہنچ گئی

کورونا ویکسین کی پہلی کھیپ سعودی عرب پہنچ چکی ہے۔

سبق ویب سائٹ کے مطابق وزیر صحت ڈاکٹر توفیق الربیعہ نے کہا ہے کہ ’آج بدھ کو فائزر کمپنی کی تیار کردہ ویکسین پہنچ چکی ہے‘۔

انہوں نے شہریوں اور مقیم غیر ملکیوں کو ہدایت کی ہے کہ ’ویکسین لینے کے لیے صحتی ایپ میں رجسٹریشن کریں‘۔

دوسری طرف وزارت صحت نے کہا ہے کہ ’صحتی ایپ میں رجسٹریشن کے آغاز سے اب تک ایک لاکھ 50 ہزار سے زائد شہریوں اور مقیم غیر ملکیوں نے خود کو رجسٹرڈ کیا ہے‘۔

ٹوئٹر پراپنے اکاؤنٹ میں وزارت نے کہا ہے کہ ’کورونا ویکسین لینے کے خواہشمند شہری و غیر ملکی صحتی ایپ میں خود رجسٹرڈ کرلیں‘۔

’ویکسین کی دستیابی پر پہلے رجسٹریشن کرنے والوں کو پہلے بلایا جائے گا، انہیں قریبی مرکز میں پیشگی وقت دیا جائے گا‘۔

واضح رہے کہ وزارت صحت نے کل منگل کو کورونا ویکسین لینے کے خواہشمندوں کو ایپ میں رجسٹریشن کی ہدایت کی تھی۔

وزارت نے کہا ہے کہ ’تین مراحل میں ویکسین دی جائے گی، یہ شہریوں اور مقیم غیر ملکیوں کے لیے بالکل مفت ہوگی‘۔

’پہلے مرحلے میں ان افراد کو ویکسین دی جائے گی جن کی عمریں 65 سال سے زیادہ ہیں، وہ افراد جو کورونا کے مریضوں سے براہ راست معاملہ کرتے ہیں اور وہ جو مستقل بیماریوں میں مبتلا ہیں‘۔

’دوسرے مرحلے میں ان افراد کو شامل کیا جائے جن کی عمریں 50 سال سے زیادہ ہیں، صحت عملہ اور مستقل بیماریوں میں مبتلا افراد بھی اس مرحلے میں شامل ہوں گے‘۔

’جبکہ تیسرے مرحلے میں یہ ان تمام شہریوں اور مقیم غیر ملکیوں کے لیے فراہم ہوگی جو ویکسین لینے کے خواہشمند ہوں گے‘۔