’ابھی تو سورج اگا ہے‘ مودی کا شاعرانہ طرز پر نئے سال کا استقبال

انڈیا کے دارالحکومت دہلی نے گذشتہ 15 برسوں میں سب سے ٹھنڈا نیا سال دیکھا ہے جہاں پہلے دن کا درجہ حرارت 1.1 ڈگری سینٹی گریڈ ریکارڈ کیا گیا لیکن اسی سال کے آغاز پر انڈیا کے لوگوں کو وزیراعظم نریندر مودی کی شاعرانہ صلاحیت کے بارے میں بھی علم ہوا ہے۔

وزیراعظم نریندر مودی کی ایک نظم ’مائی گوو انڈیا‘ کے ٹوئٹر ہینڈل سے شیئر کی گئی ہے جسے سوشل میڈیا پر جہاں حوصلہ افزا اور امید افزا نظم قرار دیا جا رہا ہے وہیں اس کے متعلق بہت سے سوال بھی پوچھے جا رہے ہیں۔

خیال رہے کہ اس سے قبل بی جے پی کے سابق رہنما اور سابق وزیراعظم اٹل بہاری واجپئی کو ہندی زبان کا مستند شاعر مانا جاتا تھا اور ان کے شعری مجموعے منظر عام پر آ چکے تھے۔

لیکن وزیراعظم نریندر مودی نے نئے سال پر اپنی نظم پیش کر کے سب کو حیران کر دیا ہے۔ ان کی نظم کا عنوان ’ابھی تو سورج اگا ہے‘ ہے۔

ٹوئٹر پر کئی صارف نے اٹل بہاری واجپئی سے ان کا مقابلہ کیا ہے اور ایک صارف نے واجپئی کی ایک نظم شیئر کرتے ہوئے لکھا کہ نریندر مودی کو اٹل بہاری واجپئی کی یہ نظم سننی چاہیے۔

وزیر اعظم مودی کی جس نظم کو سرکاری ٹوئٹر ہینڈل سے شیئر کیا گیا ہے اس ویڈیو میں انڈیا کا میزائل آسمان پر پرواز کرنے کے لیے نکلتا ہے اور اس کے ساتھ کورونا کے خلاف لڑنے والے میڈیکل سٹاف اور ملک کی فوج اور لڑاکا طیاروں کے ساتھ مختلف گوشوں کو اجاگر کیا گیا ہے۔

ان کی نظم کا ایک بند یہاں پیش کیا جا رہا ہے:

آسماں میں سر اٹھا کر

گھنے بادلوں کو چیڑ کر

روشنی کا سنکلپ لیں (روشنی کا عہد کریں)

ابھی تو سورج اگا ہے۔

انڈیا میں کسانوں کا مظاہرہ گذشتہ ایک ماہ سے زیادہ عرصے سے جاری ہے اور اس کے تناظر میں شیل 591 نامی ایک صارف نے لکھا کہ سنہ 1953 میں بمل رائے نے ایک شاہکار فلم ’دو بیگھا زمین‘ بنائی تھی اور یہ فلم ربندر ناتھ ٹیگور کی نظم ’دوئی بیگھا جومی‘ پر مبنی تھی۔ واقعتاً مودی اسی کو حقیقت میں بدل رہے ہیں، یعنی آج کے زمینداروں کے ساتھ مل کر چھوٹے کسانوں کو مزدور بنار رہے ہیں۔‘

اور اپنے دوسرے ٹویٹ میں انھوں نے لکھا ہے کہ وہ زمیندار ’امبانی اور اڈانی ہیں۔‘

ایک صارف نے لکھا ہے کہ سورج اس وقت اگے گا جب آپ استعفی دو گے۔ تو کسی نے کہا کہ ان سے پوچھیں کہ یہ نظم کہاں سے نقل کی ہے۔ تو ایک صارف نے لکھا ہے کہ ہمیشہ منفی سوچ نہیں رکھنی چاہیے۔

اس نظم میں وزیراعظم مودی نے نئے سال کی مبارکباد بھی دی ہے اور خوشیوں اور خوشحالی کی نیک خواہشات کا اظہار بھی کیا ہے۔