ڈاکار ریلی کا افتتاح آج جدہ میں ہوگا

جدہ کی کنگ عبد اللہ اکنامک سٹی میں ڈاکار ریلی کا افتتاح آج ہوگا۔

گورنر مکہ مکرمہ شہزادہ خالد الفیصل کی نیابت کرتے ہوئے جدہ کے کمشنر شہزادہ مشعل بن ماجد ریلی کا افتتاح اور تقریب کی صدارت کریں گے۔

تقریب میں سپورٹس کے وزیر شہزادہ عبد العزیز بن ترکی الفیصل اور سعودی آٹو موبائل اور موٹر سائیکل فیڈریشن کے صدر شہزادہ خالد بن سلطان العبد اللہ الفیصل بھی شرکت کریں گے۔

اس موقعے پر وزیر کھیل شہزادہ عبد العزیز بن ترکی الفیصل نے کہا ہے کہ ’ایک بار پھر سعودی عرب کھیلوں کے مقابلوں میں اپنا عظیم مقام ثابت کر رہا ہے‘۔

’سعودی عرب میں کھیلوں کے شعبے کی ترقی خادم حرمین شریفین شاہ سلمان بن عبدالعزیز اور ولی عہد محمد بن سلمان کی توجہ اور کاوشوں کا نتیجہ ہے‘۔

انہوں نے کہاہے  کہ ’ہمیں ڈاکار ریلی کی میزبانی پر خوشی ہے جو دنیا کا سب سے بڑا مقابلہ ہے‘۔