مشاہد اللہ خان دوہری شخصیت کے مالک تھے

عموماً دیکھا گیا ہے کہ بیشتر سیاست دان لکھنے والوں اور صحافیوں کے متعلق دوہرے رویے کا شکار ہوتے ہیں۔ جب یہ اپوزیشن میں ہوتے ہیں تو انھیں ہر لکھنے والے میں جمہوریت کا چراغ جلتا نظر آتا ہے اور جب یہی سیاست دان حکومت میں آجاتے ہیں تو وہی لفظ جن کی بے باکی پر وہ عش عش کرتے تھے انھی کو بغاوت تصور کرتے ہیں۔

سینیٹر مشاہد اللہ خان ایسے نہیں تھے۔ وہ اپوزیشن میں بھی اتنے ہی دوست تھے جتنے وزیر کے عہدے پر براجمان ہو کر رہے۔ ان کی شخصیت کے بھی اگرچہ دو روپ تھے مگر اس کی تفصیل کچھ مختلف ہے۔

مشاہد اللہ خان کا ایک روپ وہ ہے جو فلور آف دی ہاؤس پر نظر آتا تھا، جہاں وہ ایک شعلہ بیان مقرر تھے، مخالفین پر تاک تاک کر ایسے وار کرتے کہ کسی سے ان کے جملے کی کاٹ سہی نہ جاتی تھی، شعر کا ایسا برجستہ ذوق کم ہی لوگوں کو حاصل تھا، جس لحن سے وہ شعر پڑھتے اس سے معنی دو چند ہو جاتے، مطالعے کا بہت شوق تھا، ہر شاعر سے ان کی ذاتی علیک سلیک رہتی تھی، پھر اس کا کلام بھی ان کو ازبر تھا۔

اس دَورِ پُرخار میں وہ حکومتی بنچز کے شور و غوغے کا ڈٹ کر مقابلہ کرتے۔ ان کے ترکش میں کئی تیر تھے، جگت سے بھی باز نہیں آتے تھے۔

جمہوریت اور جمہوری روایات پر کٹ مرنے کو تیار رہتے تھے۔ ایسے موقعوں پر آپ کو وہ مشاہد اللہ نظر آتے تھے جن کے لفظوں سے جمہوریت کے نام پر ہونے والے فراڈ کی قلعی لمحوں میں کھل جاتی تھی، وہ مختصر لفظوں میں اپنا مدعا بیان کرتے، اپنی پارٹی کے دفاع پر جان کی پرواہ نہ کرتے تھے، آمریت کے فخریہ ازلی دشمن کہلاتے تھے۔

جنرل مشرف کے مارشل لا میں جلوس نکالتے، گرفتاریاں دیتے، ٹریڈ یونینز کو متحرک کرتے ہوئے وہ کبھی خوفزدہ نہیں ہوئے تھے۔ بڑے بڑے طرم خان ان کی تقریر سے تھر تھر کانپتے تھے، لگی لپٹی رکھنے کا ان کو کوئی یارا نہ تھا، وہ ببانگ ِدہل اپنا مدعا بیان کرتے، ڈٹ کر مقابلہ کرتے اور بے خوف ہو کر سرکاری ترجمانوں سے بھڑ جاتے۔

ٹاک شو ہو یا اسمبلی کا فلور، ان کے نظریے اور نکتہ نظر میں کبھی کوئی فرق نہیں آیا، اس معاملے میں وہ یک رنگی کا شاہکار تھے، دوغلا پن ان میں نام کو نہیں تھا۔

اس ملک کی سیاست کو انھوں نے کارکن کی سطح سے لے کر سینیٹر کے مقام تک دیکھا، اس جدوجہد نے ان کا جمہوریت پر ایمان غیر متزلزل کر دیا تھا، وہ سول سپرمیسی کے لیے اپنی ذات سے لےکر جماعت تک ہر جگہ سرگرم ِعمل نظر آتے تھے، وہ بے پناہ سیاسی سوجھ بوجھ کے مالک تھے، وہ اس راہ پُرخطر کے سارے رموز سے آگاہ تھے۔ اپنے موقف پر ڈٹ جانا ان کے لیے مشکل نہیں تھا کہ یہ تو ان کی شخصیت کا حصہ تھا، ان کی سیاسی تربیت کا نتیجہ تھا، ان کی سوچ کا عکس تھا، ان کے لیے عادت کی طرح آسان تھا۔

مشاہد اللہ خان کی شخصیت کا دوسرا روپ آپ کو نجی محفلوں میں دکھائی دیتا تھا۔ ان محفلوں میں وہ نہ شعلہ بیان مقرر ہوتے تھے، نہ جلالی اپوزیشن لیڈر ہی تھے بلکہ ان لمحوں میں وہ صرف دوست تھے، چھوٹے بڑے ہر شخص کے دوست۔ ایسے میں لطیفے بھی سنے جاتے، کثیفے بھی کہے جاتے، شفقت کا مظاہرہ بھی ہوتا، محبت کا برتاؤ بھی، شعر و سخن کا دَور بھی چلتا، رومانیت کا ذکر بھی ہوتا۔ ایسے لمحات میں آپ بالکل بھول جاتے کہ یہ وہی شخص ہے جو بجلی بن کر اپنے مخالفین پر برستا ہے، آپ کو یاد تک نہ آ سکتا تھا کہ یہ وہی شخص ہے جو اپنے موقف کی حمایت میں ایک جنگجو کی طرح ڈٹ جاتا ہے۔

مشاہد اللہ خان اپوزیشن میں ہوں یا حکومت میں، خود فون اٹھاتے، کبھی کسی سیکرٹری نے یہ نہیں کہا کہ ’صاحب میٹنگ میں ہیں۔‘ اگر کبھی فون نہ اٹھا پاتے تو بعد میں ان کا فون ضرور آتا، پہلے معذرت کرتے پھر بات آگے بڑھاتے لیکن ان کی شخصیت کا یہ روپ وہ نہیں جس کا تذکرہ اول الذکر کیا گیا تھا۔

نجی محفلوں میں جب گفتگو میں نواز شریف اور مریم نواز کا ذکر آ جاتا تو مشاہد اللہ خان کی جون ہی بدل جاتی، ان کی آنکھوں میں چمک اور لہجے میں لوچ آ جاتا۔ بہت تفصیل سے نواز شریف سے اپنے دیرینہ تعلقات کا ذکر کرتے۔

مریم نواز کا ذکر کرتے ہوئے ان کے لہجے میں پدرانہ شفقت آ جاتی۔ وہ سمجھتے تھے کہ نواز شریف کے بعد مریم نواز ہی اس پارٹی کی قیادت کی درست حق دار ہیں۔ 

وہ اپنی پارٹی میں موقع پرست اور وفا فروش لوگوں سے بھی واقف تھے ان پر کڑھتے بھی تھے اور نجی محفلوں میں کھل کر ان کے نام بھی لیتے تھے لیکن ان کی یہ گفتگو آف دی ریکارڈ تھی، اس کو آف دی ریکارڈ رکھنے میں ہی عافیت ہے۔ جمہوریت اور میاں نواز شریف سے ان کی وفاداری آخری لمحوں تک غیر مشروط رہی۔ 

جب آخری بار میری مشاہد اللہ صاحب سے بات ہوئی تو وہ بہت علیل تھے لیکن مختصر گفتگو میں بھی یہ کہہ گئے کہ ’یہ موجودہ مصنوعی سیٹ اپ جمہوریت کے ماتھے پر کلنک کا ٹیکہ ہے اور ایسا جعلی نظام مارچ، اپریل سے آگے نہیں چلے گا۔‘

بدقسمتی سے ہم نے اس ملک میں اپنے تعلیمی، سماجی، سیاسی اور معاشی نظام سے ایک ایسا سسٹم تخلیق کیا ہے کہ جس میں بڑے قد کا آدمی پنپ ہی نہیں سکتا، بونوں کے اس دیس میں بڑے قد کے آدمی کی پہلے ٹانگیں کاٹ دی جاتی ہیں، اسے اپنے ہم قامت کرنے بعد ہی بات کی جاتی ہے۔ اسی ماحول میں مشاہد اللہ خان نے اپنا قد بنایا، وہ اس گھٹے ہوئے ماحول کے باوجود ایک بڑے آدمی تھے۔ کتنا الم ہے کہ اس دور ِقبیح میں ہم کتنے نگینوں سے محروم ہو گئے، جسٹس وقار سیٹھ، حاصل بزنجو، ارشد وحید چوہدری کے بعد مشاہد اللہ کا انتقال ان کے اہل خانہ کے لیے ہی نہیں اس ملک اور جمہوریت کے لیے بھی بہت بڑا نقصان ہے۔