وزیراعظم عمران خان کی اہلیہ بشریٰ بی بی بھی کورونا وائرس سے متاثر

وزیراعظم عمران خان کا کورونا ٹیسٹ مثبت آنے کے بعد ان کی اہلیہ بشریٰ بی بی بھی کورونا وائرس کا شکار ہو گئی ہیں جس کے بعد انہوں نے خود کو گھر میں آئسولیٹ کرلیا ہے۔

وزیراعظم کے معاون خصوصی برائے سمندر پار پاکستانیز زلفی بخاری نے سنیچر کو ایک ٹوئٹر بیان میں خاتونِ اول کے کورونا میں مبتلا ہونے کی تصدیق کی۔

انہوں نے وزیراعظم اور ان کی اہلیہ کی جلد صحت یابی اور ان کے لیے نیک خواہشات کا اظہار کیا۔

مزید پڑھیں

زلفی بخاری کا کہنا تھا کہ ’ویکسین لگوانے سے قبل ہی وزیراعظم کورونا وائرس میں مبتلا ہو چکے تھے۔‘

اس حوالے سے وزیراعظم عمران خان کے معاون خصوصی امور شہباز گِل نے بتایا ہے کہ ’وزیراعظم صاحب کا کورونا کا ٹیسٹ آج (سنیچر کو) ہی کیا گیا ہے۔‘ 

براہ مہربانی اس کو کورونا ویکسین کے ساتھ مت جوڑیں۔ ویکسین لگنے کے کچھ ہفتے کے بعد قوت مدافعت پیدا ہوتی ہے۔  اپنے بزرگوں اور پیاروں کو ویکسین ضرور لگوائیں۔ احتیاط کریں۔

وزیراعظم کے معاون خصوصی برائے سیاسی امور شہباز گِل نے ایک ٹویٹ میں سوشل میڈیا پر ہونے والی ان قیاس آرائیوں کو سختی سے مسترد کیا ہے جس میں ویکسین کے بارے میں سوالات کیے جا رہے تھے۔