سابق امریکی صدر بل کلنٹن کی طبیعت خراب، کیلی فورنیا کے ہسپتال میں داخل

امریکہ کے سابق صدر بل کلنٹن کو دو دن قبل علاج کی غرض سے کیلی فورنیا کے اروین ہسپتال میں داخل کیا گیا۔ ان کے ترجمان کا کہنا ہے کہ سابق صدر کورونا وائرس کے انفیکشن میں مبتلا نہیں ہیں۔

برطانوی خبر رساں ایجنسی روئٹرز کے مطابق 75 سالہ بل کلنٹن کے ترجمان اینجل اورینا نے اپنے ٹوئٹر اکاؤنٹ پر لکھا ہے کہ ’منگل کی شام کو سابق صدر بل کنٹن کو ’نان کووڈ انفیکشن‘ کے علاج کے لیے یو سی آئی میڈیکل سینٹر میں داخل کیا گیا ہے۔‘

انہوں نے مزید بتایا کہ ’ان کا علاج جاری ہے، وہ بہتر ہیں اور انہیں بہترین علاج فراہم کرنے پر ڈاکٹر، نرسوں اور عملے کے انتہائی شکرگزار ہیں۔‘

امریکی نشریاتی ادارے سی این این نے اپنی رپورٹ میں بتایا ہے کہ سابق صدر کا یونیورسٹی آف کیلیفورنیا اروین کے میڈیکل سینٹر میں علاج کرنے والے ڈاکٹرز کے مطابق کلنٹن کو انتہائی نگہداشت کے یونٹ میں رکھا گیا ہے تاکہ انہیں پرائیویسی مل سکے، وہ وینٹی لیٹر پر نہیں ہیں۔

سی این این کے مطابق ان کی طبیعت کی خرابی  دل کی بیماری یا کورونا وائرس سے متعلقہ نہیں ہے۔