امارات: گوشت اور مرغیوں کے نرخوں میں 23 فیصد اضافہ

متحدہ عرب امارات میں گوشت اور مرغیوں کے نرخ  23 فیصد تک بڑھ گئے- ان میں درآمدی جانوروں اور مرغیوں کے نرخ ہی نہیں بلکہ اندرون ملک کے جانوروں اور مرغیوں کے نرخ بھی شامل ہیں دونوں میں اضافہ ہوا ہے-

الامارات الیوم کے مطابق گوشت اور مرغیوں کے نرخوں میں اضافہ غیر متوقع طور پر ہوا- صارفین نے متعلقہ اداروں سے مطالبہ کیا ہے کہ وہ بازاروں میں چھاپہ مہم شروع کریں اور مقررہ قوانین کی خلاف ورزی کرنے والوں کی سرزنش کی جائے-

مارکیٹوں کے  دو عہدیداروں کا کہنا ہے کہ امارات میں مرغیوں اور گوشت کے نرخ بڑھنے  کا سبب  بین الاقوامی مارکیٹ میں قیمتوں میں اضافہ ہے- 

ایک جانب  کارگو کی لاگت بڑھ گئی ہے تو دوسری جانب جانوروں اور مرغیوں پر آنے والی لاگت میں بھی اضافہ ہوا ہے- 

بیرون ملک  سے آنے والی مرغیاں اور گوشت خاص طریقے سے لائے جاتے ہیں- اس کی وجہ سے  کارگو کی لاگت بڑھ  جاتی ہے- علاوہ ازیں چارہ اور ابتدائی مواد کے نرخوں میں بھی اضافہ ہواہے-

ایک صارف خاتون نورہ الہاشمی نے کہاکہ حالیہ ایام کے دوران اضافہ ناقابل فہم اسباب کے تحت ہوا ہے۔ جو کچھ ہوا ہے اچانک ہوا ہے- پہلے درآمدی گوشت 37 درہم فی کلو میں دستیاب تھا اب اس کی قیمت 43 درہم ہوگئی ہے 16.2 فیصد سے زیادہ مہنگا ہوگیا ہے- مقامی مرغی 17 درہم فی کلو گرام میں دستیاب تھی اب  21 درہم میں فروخت ہورہی ہے اس میں  23.5 فیصد کا اضافہ ہوا ہے-  

الہاشمی کا کہنا ہے کہ نہ مرغیوں سے انسان بے نیاز ہوسکتا ہے اور نہ ہی گوشت سے لہذا مارکیٹوں کی کڑی نگرانی ناگزیر ہے-  

محمد محسن نامی صارف نے کہاکہ  ایک کلو گرام گوشت 34 ریال میں مل رہا تھا اب 39 درہم میں فروخت ہورہا ہے 14.7 فیصد اضافہ ہوگیا ہے- کم چکنائی والا درآمدی گوشت  44 درہم فی کلو مل رہا تھا اب  51 ریال میں دستیاب ہے اس میں 16 فیصد کا اضافہ ہوا ہے-  

ایک خاص قسم کی مرغی 17.50  درہم میں دستیاب تھی اب اس کی قیمت  20.75 درہم ہوچکی ہے اس حوالے سے 18 فیصد کا اضافہ ہوچکا ہے-

امارات کی خبروں کے لیے ”اردو نیوز یو اے ای“ گروپ جوائن کریں