پاکستان میں رجسٹرڈ چنگ چی رکشے چلانے کی اجازت

اسلام آباد..سپریم کورٹ نے ملک بھر میں رجسٹرڈ مینو فیکچررز کے چنگ چی رکشے چلانے کی اجازت دے دی۔جسٹس گلزار احمد کی سربراہی میں سپریم کورٹ کے 2 رکنی بنچ نے اپیلوں کی سماعت کی۔سرکاری وکیل نے بتایا کہ پنجاب، خیبر پختونخوا اور بلوچستان میں غیرقانونی چنگ چی رکشوں پر پابندی ہے، صرف منظور شدہ رکشے چلائے جاسکتے ہیں۔ جسٹس گلزار نے ریمارکس دیئے کہ حکومت میٹرو، گرین بس اور اورنج لائن ٹرانسپورٹ چلا رہی ہے لیکن کراچی میں 1950 کی بسیں چل رہی ہیں۔لوگوں کا روزگار لگ جائے تو حکومت ہوش میں آتی ہے۔حکومت کے پاس غیرقانونی چنگ چی کے اعدادوشمار موجود نہیں۔جسٹس گلزار نے ریمارکس دیئے کہ حکومت نے مسئلہ بھی حل کرنا ہے اور لوگوں کا روزگار بھی بحال رکھنا ہے۔ سپریم کورٹ نے پورے ملک میں منظور شدہ مینو فیکچرر کے رکشے چلانے کا حکم دیتے ہوئے کہا کہ اس کے سواکوئی چنگ چی رکشہ چلانے کی اجازت نہیں ہوگی۔ اس سے قبل جنوری میں سپریم کورٹ نے کراچی میں چنگ چی چلانے کی مشروط اجازت دیتے ہوئے چاروں صوبوں کو موٹر سائیکل رکشوں کی فٹنس اور سیفٹی یقینی بنانے کی ہدایت کی تھی۔