گوادر کے فٹ بال سٹیڈیم کی خوبصورتی کے چرچے

گوادر میں کرکٹ سٹیڈیم کے بعد فٹ بال سٹیڈیم کی خوبصورتی نے بھی لوگوں کو اپنے سحر میں جکڑ لیا ہے ۔ ساحل سمندر سے کچھ فاصلے پر کوہ باطل کے دامن میں بنے فٹ بال کے میدان کی خوبصورتی کی سوشل میڈیا پر صارفین نے تعریف کی ہے۔

گوادر ڈویلپمنٹ اتھارٹی کے ڈائریکٹر جنرل مجیب الرحمان قمبرانی نے اردو نیوز کو بتایا کہ ایک لاکھ 38 ہزار مربع فٹ رقبے پر پھیلے اس پرانے فٹ بال سٹیڈیم کی گوادر ڈویلپمنٹ اتھارٹی نے نئے سرے سے تزئین و آرائش کی ہے ۔ پہلے یہ کھنڈرات کا منظر پیش کررہا تھا اور یہاں کوئی سبزہ نہیں تھا اور کھلاڑی مٹی کے اس میدان میں کھیلتے تھے۔

انہوں نے بتایا کہ فٹ بال میدان میں خوب صورت سبزہ بچھایا گیا ہے، اس کے ساتھ ہی فلڈ لائٹس بھی لگادی گئی ہیں اب رات کو بھی یہاں مقابلے کھیلے جاسکیں گے۔

انہوں نے بتایا کہ تماشائیوں کے بیٹھنے کے لیے نیا پویلین ، خاص مہمانوں کے لیے بیٹھنے کی الگ جگہ ، کھلاڑیوں کے لیے کمرے اور دفاتر بنائے گئے ہیں ۔ زیر زمین پانی کی ٹینکی ،واکنگ ٹریکس اورتماشائیوں کے لیے واش رومزکی تعمیر کے ساتھ ساتھ پہلے سے موجو د چار دیواری کو بلند کرنے ، پارکنگ   اور دیگر سہولیات کو بھی بہتر بنا لیا گیا ہے۔

ڈائریکٹر جنرل جی ڈی اے کے مطابق فٹ بال سٹیڈیم کی تزئین و آرائش پر ایک کروڑ 63 لاکھ روپے کی لاگت آئی ۔ جلد وزیراعلیٰ بلوچستان اس فٹ بال سٹیڈیم کا افتتاح کریں گے۔

مجیب قمبرانی کا کہنا تھا کہ گوادر میں فٹ بال بہت شوق سے کھیلا جاتا ہے ، فٹ بال کے شائقین نے میدان کی بہتری پر خوشی کا اظہار کیا ہے۔ ان کا کہنا تھا کہ ہم پرانی آبادی میں موجود باقی میدانوں کو بھی بہتر کررہے ہیں تاکہ شہر کے نوجوان بہتر اور اچھے ماحول میں صحت مندانہ سرگرمیوں کو جاری رکھ سکیں۔

کچھ عرصہ قبل گوادر کے باطل نامی پہاڑ کے دامن میں کرکٹ سٹیڈیم کی خوبصورتی کی عالمی سطح پر چرچے ہوئے تھے۔ انٹرنیشنل کرکٹ کونسل سمیت انٹرنیشنل کرکٹرز نے میدان کی تصاویر سوشل میڈیا پر شیئر کرتے ہوئے اس کی خوب صورتی کی تعریف کی تھی۔

گوادر کے ایک فٹ بال کھلاڑی خدا بخش بلوچ نے بتایا کہ فٹ بال کا یہ میدان بھی اس کرکٹ سٹیڈیم سے کچھ ہی فاصلے پر موجود تھا تاہم حالت کافی خراب تھی ، فٹ بال کھیلتے ہوئے دھول مٹی اڑتی تھی اور یہاں نوجوان فٹ بال کے ساتھ ساتھ کرکٹ بھی کھیلتے تھے۔

انہوں نے فٹ بال میدان کی حالت بہتر بنانے پر خوشی کا اظہار کیا اور ساتھ یہ توقع بھی ظاہر کی کہ اس میدان تک عام کھلاڑیوں کی رسائی کو آسان بنایا جائے گا ۔