مریم نواز کی گرفتاری کے لیے ایف آئی اے میں درخواست

حکمران جماعت پاکستان تحریک انصاف کی رکن قومی اسمبلی عالیہ حمزہ نے ایف آئی اے کے سائبر ونگ میں مریم نواز کے خلاف درخواست دے دی ہے، جس میں انہیں گرفتار کرنے کا مطالبہ کیا گیا ہے۔

اتوار کو وزیراعظم کے خلاف ٹرینڈ چلانے پر مسلم لیگ ن کے ورکر صابر ہاشمی کو گرفتار کیا گیا تھا جس کے بعد مریم نواز نے ٹویٹ کرتے ہوئے اس کی مذمت کی تھی۔

بدھ کے روز دی جانے والی درخواست میں اسی ٹویٹ کو بنیاد بنایا گیا ہے۔

عالیہ حمزہ کی درخواست میں موقف اختیار کیا گیا ہے کہ ’خاتون اول نہ سیاست دان ہیں اور نہ ہی سیاسی بیان دیتی ہیں، ان کا سیاست سے کوئی تعلق نہیں، اس لیے ان کے خلاف ٹرینڈ چلانا سنگین جرم ہے۔‘

درخواست میں یہ بھی کہا گیا ہے کہ ’صابر محمود ہاشمی نامی شخص کو خاتون اول کے خلاف ٹرینڈ چلانے پر گرفتار کیا گیا ہے، مریم صفدر اس کی حمایت میں ٹویٹ کر کے اور ضمانت کی منظوری دے کے یہ اقبال جرم کر رہی ہیں کہ خاتون اول کے خلاف یہ سب ان کے ایما پر کیا گیا۔‘

 درخواست کے آخر میں امید ظاہر کی گئی ہے اپنے اختیارات کے اندر رہتے ہوئے جلد از جلد مریم صفدر کو گرفتار کر لیا جائے گا۔

دوسری جانب مریم نواز نے اس درخواست کے بعد ایک اور ٹویٹ میں وزیراعظم کو مخاطب کرتے ہوئے لکھا ’ آپ کوئی آسمان  سے اتری مخلوق نہیں، جس کی شان میں گستاخی کرنے پر شہریوں کے گھروں پر دھاوا بولا جائے گا اور ان کو سلاخوں کے پیچھے پھینکا جائے گا۔‘

مریم نواز کی جانب سے مزید لکھا گیا ’آپ کی اہلیہ کا جو احترام ہے، وہی میری آئی سی یو میں بے ہوش پڑی والدہ کا ہونا چاہیے تھا، مخالفین کی بہنوں اور بیٹیوں کا ہونا چاہیے تھا۔‘

خیال رہے 14 فروری کو وفاقی تحقیقاتی ادارے (ایف آئی اے) کے سائبر کرائم سیل نے وزیراعظم کے خلاف ٹرینڈ چلانے کے الزام میں اپوزیشن جماعت ن لیگ کے ورکر اور سوشل میڈیا ایکٹیویسٹ صابر ہاشمی کو گرفتار کرنے کی تصدیق کی تھی۔

 ایف آئی اے کی جانب سے کہا گیا تھا کہ صابر ہاشمی کے خلاف مقدمہ درج کر کے انہیں لاہور کے علاقے ماڈل ٹاؤن سے گرفتار کیا گیا ہے۔

اسی شام صابر محمود ہاشمی کی گرفتاری کے اعلان سے قبل سوشل میڈیا پر متعدد صارفین نے دعوی کیا تھا کہ انہیں اغوا کیا گیا ہے۔

مسلم لیگ ن کی نائب صدر مریم نواز نے صابر محمود ہاشمی کے معاملے پر تبصرے میں اسے ’دن دیہاڑے اغوا‘ قرار دیا تھا۔