چیئرمین سینیٹ کا اسحاق ڈار کا لندن سے ورچوئل حلف لینے سے انکار

چیرمین سینیٹ صادق سنجرانی نے لندن میں علاج کے لیے قیام پذیر مسلم لیگ ن کے رہنما اسحاق ڈار کو ویڈیو لنک پر حلف لینے سے انکار کر دیا ہے۔  

منگل کو چیئرمین سینیٹ نے اسحاق ڈار کی جانب سے لکھے گئے خط کے جواب میں آگاہ کیا ہے کہ ’آئین اور سینیٹ کے قواعد کے تحت منتخب رکن کو ایوان کے سامنے حلف اٹھانا ہوتا ہے۔

خط کے مطابق ’منتخب رکن سے ورچوئل حلف نہیں لیا جا سکتا اور نہ ہی کسی کو نمائندہ مقرر کرکے حلف ممکن ہے۔ قواعد کے تحت منتخب رکن کو ایوان میں رجسٹر پر دستخط کرنا ہوتے ہیں۔‘  

چیئرمین سینیٹ کا کہنا ہے کہ سینیٹ پارلیمنٹ کا حصہ ہے اور اپنے قواعد کے تحت چلتا ہے۔ کسی ہائی کمشنر کو سینیٹ کا متبادل نہیں بنایا جا سکتا۔ آئین کے آرٹیکل 255کا سینیٹ حلف برداری پر اطلاق نہیں ہوتا۔‘  

چیئرمین سینیٹ نے اپنے خط میں آئین کے آرٹیکل 65 ، سینیٹ قواعد 6 اور 7 اور آئین کے آرٹیکل 255 کو بطور پیش کرتے ہوئے کہا ہے کہ ’آئین اور قواعد کی روشنی میں ورچوئل حلف برداری کی درخواست پر عمل در آمد ممکن نہیں اس لیے انکار کیا جاتا ہے۔  

اسحاق ڈار نے دو فروری کو چیئرمین سینیٹ کا خط لکھ کر اپنے حلف کے بارے میں آگاہ کیا تھا اور درخواست کی تھی ان کا ورچوئل حلف لے لیا جائے۔  

اسحاق ڈار نے اپنے خط میں کہا تھا کہ 3 مارچ 2018ء کو سینیٹ کی نشست پر میرا انتخاب چیلنج کرنے کا قانونی تنازع حل ہو چکا ہے۔

سپریم کورٹ نے 21 دسمبر 2021ء کو سول اپیل مسترد کر دی ہے۔ عدالتِ عظمیٰ کا 8 مئی 2018ء کا ممبر شپ کی معطلی کا حکم نامہ ختم ہو گیا۔ الیکشن کمیشن نے 10 جنوری 2022ء کا میری سینیٹ کی نشست پر کامیابی معطلی کا نوٹیفکیشن واپس لے لیا ہے۔ 

اسحاق ڈار نے کہا ہے کہ قانونی رکاوٹیں دور ہونے کے بعد بطور منتخب سینیٹر حلف اٹھانے کے لیے تیار ہوں۔ تاہم برطانیہ میں زیر علاج ہونے کے سبب فی الحال ذاتی طور پر آنے سے قاصر ہوں۔ بطور سینیٹر مجھ سے ویڈیو لنک کے ذریعے حلف لیا جائے۔ بذریعہ ویڈیو لنک حلف کا طریقہ سپریم کورٹ میں پہلے ہی زیرِ استعمال ہے۔ 

اسحاق ڈار کا خط میں کہنا تھا کہ ممکن نہ ہو تو چیئرمین سینیٹ آئین کے آرٹیکل 255 کے تحت برطانیہ میں پاکستانی ہائی کمشنر یا کسی مجاز شخص کے ذریعے حلف لینے کا انتظام کریں۔

اسحاق ڈار نے چیئرمین سینیٹ کو لکھے گئے خط میں آئین کے آرٹیکل 255 کی ذیلی شق 2 کا حوالہ بھی دیتے ہوئے کہا تھا کہ اس آئینی شق کے تحت چیئرمین سینیٹ کسی شخص کو منتخب رکن سے حلف لینے کے لیے مقرر کر سکتے ہیں۔ 

اسحاق ڈار نے خط کے ہمراہ لندن میں اپنے معالج کی تازہ ترین میڈیکل رپورٹ بھی ارسال کی تھیں۔