کنگ سلمان ریزرو میں ایک سو ہرن چھوڑے گئے

کنگ سلمان ریزرو ڈویلپمنٹ اتھارٹی نے جنگلی حیات کی افزائش کے لیے 100 ہرن اور متعدد اقسام کے پرندے چھوڑے ہیں۔

سبق ویب سائٹ کے مطابق ریزرو کا قدرتی ماحول بحال کرنے اور اسے سیاحتی مقام بنانے کے لیے اتھارٹی متعدد اقدامات کر رہی ہے۔

اتھارٹی نے کہا ہے کہ ’ریزرو میں جنگلی حیات کی افزائش  کے لیے نایاب جانوروں کو تحفظ فراہم کیا جا رہا ہے‘۔

’اس سے قبل ریزرو میں 65 ہرنوں کو چھوڑا گیا تھا جبکہ 2021 کے آغاز میں ایک سو ہرنوں کو بھی چھوڑا گیا ہے‘۔

’اب تیسری مرتبہ ہرنوں اور نایاب قسم کے پرندوں کو چھوڑا گیا ہے اور ان کی افزائش کی نگرانی کی جارہی ہے‘۔

اتھارٹی نے کہا ہے کہ ’سعودی عرب کے متعدد ریزرو میں جنگلی حیات اور فطری ماحول کی بحالی کے لیے اقدامات کے ساتھ جانوروں کے تحفظ کے لیے قانون سازی  بھی کی گئی ہے‘۔