سعودی کوہ پیما خاتون نیلی عطار پہلی مرتبہ دنیا کی دوسری بلند ترین چوٹی کے ٹو سرکرنے کےلیے پاکستان جارہی ہیں۔ نیلی عطار اس سے قبل دنیا کی بلند ترین چوٹی ماونٹ ایورسٹ کو سر کرنے کا اعزاز بھی رکھتی ہیں ۔
سعودی عرب میں پاکستان کے سفیر سمیت دیگر افسران نے سعودی خاتون کوہ پیما کی کامیابی کے لئے نیک خواہشات کا اظہار کیا ہے اور کہا ہے کہ اس سے پاکستان کی سیاحت مزید فروغ پائے گی .
نیلی اطار کی سفارت خانہ پاکستان ریاض میں سفیر پاکستان سمیت دیگر افسران سے ملاقات ہوئی۔ انہوں نے بتایا کہ ان کی ہمیشہ سے یہ خواہش تھی کہ وہ پاکستان جاکر کے ٹو کو سر کرے جس کے لئے وہ 17 جون سے پاکستان کا دورہ کر رہی ہیں جہاں وہ کے ٹوکو سر کرنے کی مہم کے علاوہ دیگر علاقوں کا بھی سفر کریں گی۔
اس حوالے سے سفیر پاکستان امیر خرم راٹھور کا کہنا تھا کہ پاکستان میں سیاحت کے فروغ کے لئے سعودی خاتون کوہ پیما کا یہ دورہ خاص اہمیت کا حامل ہے۔اس سے عرب ممالک کا رحجان بڑھے گا اور سفارت خانہ پاکستان سعودی عرب سیاحت کے ویزے کو آسان بناتے ہوئے ایک دن میں ویزہ جاری کر رہا ہے تاکہ زیادہ سے زیادہ سیاحت کو فروغ ملے سفیر پاکستان سمیت دیگر افسران نے سعودی خاتون کوہ پیما کی کامیابی کے لئے نیک خواہشات کا اظہار کیا ہے۔
