مکہ روٹ پروجیکٹ میں لاہور اور کراچی ایئرپورٹس بھی شامل کریں گے: سعودی سفیر

پاکستان میں سعودی عرب کے سفیر نواف بن سعید المالکی نے کہا ہے کہ ’آئندہ برس حاجیوں کی سہولت کے لیے مکہ روٹ پروجیکٹ میں لاہور اور کراچی کے انٹرنیشنل ایئرپورٹس کو بھی شامل کیا جائے گا۔‘

منگل کو اسلام آباد میں منعقدہ شان حرمین کانفرنس کے بعد اردو نیوز سے خصوصی گفتگو میں سعودی سفیر کا کہنا تھا کہ ‘رواں سال حج کے لیے پاکستان کا کوٹہ تقریباً 82 ہزار حجاج کا ہے اور سعودی حکومت حج کو باسہولت بنانے کے لیے کوشاں ہے۔‘

’یہ دوسرا سال ہے کہ اسلام آباد ایئرپورٹ سے مکہ روٹ پروجیکٹ کے تحت حجاج کو بھیجا جا رہا ہے۔ امید ہے ان شاء اللہ آئندہ سال پوری گنجائش کے تحت (حج ہوگا) اور پھر اسلام آباد ایئرپورٹ کے علاوہ لاہور اور کراچی ایئرپورٹس پر بھی ہوگا۔‘

انہوں نے مکہ روٹ پروجیکٹ پر عمل درآمد میں تعاون پر حکومت پاکستان کا ذکر کرتے ہوئے خاص طور پر وزیراعظم شہباز شریف کا شکریہ ادا کیا کہ ان کی دلچسپی سے یہ سہولت پاکستانی حجاج کو میسر ہوئی۔

رواں برس حجاج کے لیے سمارٹ فون ایپلی کیشنز کے استعمال کے حوالے سے بات کرتے ہوئے ان کا کہنا تھا کہ ’اس سال سمارٹ فون کے استعمال کے بعد ہر چیز پاکستانیوں کے لیے بہت آسان ہوگی اور ان شاء اللہ پاکستانی حجاج باحفاظت اور ہشاش بشاش واپس آئیں گے۔‘

اس سے قبل مقامی ہوٹل میں شان حرمین کانفرنس سے خطاب کرتے ہوئے سعودی سفیر نے دونوں ممالک کے تعلقات میں بہتری کے لیے پاکستانی علما کے کردار کو سراہا۔

ان کا کہنا تھا کہ علما نے یہ کانفرنس منعقد کرکے دونوں ممالک کے پہلے سے مضبوط تعلقات کے فروغ کی کوشش کی ہے۔

تحریک دفاع حرمین شریفین کی جانب سے منعقدہ کانفرنس سے چیئرمین سینیٹ صادق سنجرانی، جمعیت علمائے اسلام کے سیکریٹری جنرل مولانا عبدالغفور حیدری، سینیٹر ساجد میر، سینیٹر حافظ عبدالکریم اور پی ڈی ایم کے رہنما شاہ اویس نورانی نے خطاب کرتے ہوئے حجاج کی خدمت کے لیے سعودی حکومت کی کاوشوں کو خراج تحسین پیش کیا۔

 چیئرمین سینیٹ محمد صادق سنجرانی کا کہنا تھا کہ مکہ روٹ ایک بہت اہم اقدام ہے جس سے پاکستانی حاجیوں کو سہولت ہوگی۔ ان کا کہنا تھا کہ ’اس پروجیکٹ کو مزید وسعت دینے کی ضرورت ہے۔‘

’پاکستانیوں کا دل سعودی عرب کے ساتھ دھڑکتا ہے۔ سعودی عرب نے ہمیشہ مشکل حالات میں پاکستان کا ساتھ دیا ہے۔‘

چیئرمین سینیٹ نے مکہ روٹ منصوبہ شروع کرنے پر سعودی حکومت کا شکریہ ادا کیا۔

مولانا غفور حیدری اور شاہ اویس نورانی نے سعودی حکومت کے پاکستان کے ساتھ تعاون کو سراہا۔

کانفرنس کے اعلامیے میں کہا گیا ہے کہ ’سعودی عرب اور پاکستان کے تاریخی تعلقات ہیں اور دونوں ممالک نے ہر مشکل میں ایک دوسرے کا ساتھ دیا ہے۔ سعودی عرب کا تعلق پاکستان کے عوام اور علمائے کرام سعودی حکومت کی خدمات کو قدر کی نگاہ سے دیکھتے ہیں۔‘

کانفرنس کے اعلامیے میں حج کے موقع پر بہترین انتظامات پر سعودی حکومت کو خراج تحسین پیش کیا گیا۔