پرمٹ کے بغیر مکہ میں داخل ہونے والے 6 ہزار افراد گرفتار

ادارہ امن عامہ کے ڈائریکٹر اور حج سیکیورٹی فورس کے چیئرمین لیفٹیننٹ جنرل محمد البسامی نے کہا ہے کہ ’حج سیزن کے دوران حج پرمٹ کی خلاف ورزی پر 6 ہزار 310 افراد کو گرفتار کیا گیا‘۔ 

عاجل نیوز کے مطابق حج ٹاسک فورس کے چیئرمین جنرل بسامی نے مزید کہا کہ ’مملکت کے مختلف ریجنز میں جعلی حج خدمات فراہم کرنے والے 84 اداروں کو سیل کرکے ان کے ذمہ داروں کے خلاف کارروائی کی گئی‘۔ 

لیفٹیننٹ جنرل البسامی نے حج سیزن کے بارے میں سیکیورٹی انتظامات کے حوالے سے مزید کہا کہ ’حج سیزن کے آغاز سے ہی مکہ مکرمہ کے تمام داخلی راستوں کو سیل کردیا گیا تھا تاکہ کوئی بھی حج پرمٹ کے بغیر مکہ مکرمہ میں داخل نہ ہوسکے‘۔ 

مکہ مکرمہ کے داخلی چیک پوسٹوں پرمتعین سیکیورٹی اہلکاروں نے مختلف اوقات میں بغیر پرمٹ کے مکہ جانے کی کوشش کرنے والے ایک لاکھ 25 ہزار 481 افراد کو واپس کیا جبکہ 72 ہزار 503 بڑی گاڑیوں کو بھی واپس کیا جن کے مالکان کے پاس مشاعر میں جانے کے خصوصی پرمٹ نہیں تھے۔ 

سیکیورٹی فورس کے چیئرمین البسامی کا کہنا تھا کہ ’حج پرمٹ کے بغیر لوگوں کومشاعر منتقل کرنے والے 27 افراد کے خلاف تادیبی و انتظامیہ کمیٹی نے فوری طور پر فیصلے صادر کردیے ہیں‘۔ 

واضح رہے حج ایام کا آغاز ذوالحجہ کی پہلی تاریخ سے ہوجاتا ہے اس دوران حج پرمٹ کے بغیر یا ایسے افراد جن کی رہائش مکہ مکرمہ میں نہیں ہوتی کو مکہ مکرمہ میں داخل ہونے کی اجازت نہیں ہوتی۔ 

دیگر شہروں میں رہنے والے اگر حج سیزن کے دوران مکہ مکرمہ کام کی غرض سے جاتے ہیں تو انہیں اس کے لیے خصوصی پرمٹ حاصل کرنا ہوتا ہے بصورت دیگر وہ ایام حج میں مکہ مکرمہ داخل نہیں ہوسکتے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں