ججز کو بلیک میل کرنے کی کوشش کے نتائج خطرناک ہوں گے: فواد چودھری

پاکستان تحریک انصاف نے خبردار کیا ہے کہ کورٹ کے ججز کو بلیک میل کرنے کی کوشش کے نتائج خطرناک ہوں گے۔

پاکستان تحریک انصاف کی سیاسی کمیٹی کے اجلاس کے بعد اسلام آباد میں فرخ حبیب کے ہمراہ میڈیا سے گفتگو کرتے ہوئے  پی ٹی آئی رہنما فوادچودھری کا کہنا تھا کہ عدالتی فیصلوں کی تضحیک کی جارہی ہے۔

ان کا مزید کہنا تھا کہ سپریم کورٹ کے حوالے سے مسلم لیگ ن کا رویہ سیسلین مافیا والا ہے اور سپرم کورٹ کے ایک جج نے ان کو صیحح سیسلین مافیا کہا تھا۔

انہوں نے الزام عائد کیا کہ ن لیگ یہ سب کچھ باقاعدہ منصوبہ بندی کے تحت کر رہی ہے۔

’سپریم کورٹ نے پہلے ہی حمزہ شہبازکو ٹرسٹی یعنی خیراتی وزیراعلیٰ قرار دیا ہے۔‘

اس سے پہلے چیئرمین عمران خان کے زیر صدارت تحریک انصاف (پی ٹی آئی) کی سیاسی کمیٹی کا اجلاس ہوا جس میں پنجاب اسمبلی کی صورتحال اور آئندہ کی حکمت عملی پر بھی غور کیا گیا۔

اجلاس میں شاہ محمود قریشی، اسد عمر، فواد چودھری، شیریں مزاری، فرخ حبیب، شہباز گل، علی زیدی، عامر کیانی اور دیگر رہنما بھی شریک ہوئے۔

اجلاس میں وزیر اعلیٰ پنجاب کے انتخاب اور عدالتی امور پر غور کیا گیا۔ اجلاس میں آئندہ کی سیاسی حکمت عملی اور لائحہ عمل پر مشاورت کی گئی۔

قبل ازیں فواد چودھری نے ٹویٹ کیا تھا کہ ن لیگ نے اب اداروں کو ٹارگٹ کرنا ہے۔عدلیہ کے خلاف بیانات شروع ہوگئے فوج کے خلاف اگلے چند دنوں میں شروع ہو جائیں گے۔

’ن لیگ کی حکمت عملی نون لیگ کو سیاست سے مکمل باہر کر دے گی لیکن اداروں کو نقصان ہو گا۔‘

انہوں نے کہا ہے کہ ادارے اس گرداب میں اپنی قیادت کی غلطیوں سے پھنسے ہیں۔ادارے اپنی حدود میں رہتے تو کچھ نہیں تھا لیکن بہرحال اب اداروں کو ن لیگ نے ٹارگٹ کرنا ہے۔