دبئی .. آئی سی سی نے پاکستانی بلے باز سرفراز احمد کو دھکا دینے پر ویسٹ انڈین فاسٹ بولر شینن گیبریئل کے خلاف50 فیصد میچ فیس کا جرمانہ عائد کردیا ۔جمیکا پہلے ٹیسٹ میچ کے چوتھے دن پاکستان کی پہلی اننگز کے دوران ویسٹ انڈین بولر نے امپائر رچرڈ النگورتھ سے اپنی کیپ وصول کرتے ہوئے نان اسٹرائیکر اینڈ پر موجود پاکستانی بلے باز سرفراز احمد کو جان بوجھ کر دھکا دیا تھا۔شینن گیبریئل آئی سی سی کے قوانین کی خلاف ورزی کے مرتکب قرار پائے جس کے تحت کسی بھی کھلاڑی، آفیشل، امپائر یا کسی اور شخص سے جان بوجھ کر جسمانی طور پر ٹکرانا یا نقصان پہنچانا ممنوع ہے۔شینن گیبریئل پر جرمانہ عائد کرنے کے ساتھ 3 منفی پوائنٹس بھی دئیے گئے ۔ ویسٹ انڈین بولرنے اپنی غلطی کو تسلیم کرتے ہوئے میچ ریفری کرس براڈ کی سزا کو تسلیم کر لیا جس کے بعد معاملے کی سماعت کی ضرورت پیش نہیں آئی۔
