’ایسی حرکتیں نہ کریں‘، انڈین ریلوے نے سونو سود کو کیوں ڈانٹا؟

انڈین ریلوے نے بالی وڈ اداکار سونو سود کی جانب سے شیئر کی جانے والی ویڈیو پر سخت ردعمل دیتے ہوئے اسے ’خطرناک‘ قرار دیا ہے۔

این ڈی ٹی وی کے مطابق محکمہ ریلوے نے اداکار کو مخاطب کرتے ہوئے ایک قسم کی ڈانٹ پلائی ہے اور یاد دلایا ہے کہ ’آپ ایک رول ماڈل ہیں، اس (ویڈیو) سے قوم کو ایک غلط پیغام گیا ہے۔‘

خیال رہے سونو سود نے چند روز قبل 22 سیکنڈ کی اپنی ایک ایسی ویڈیو ٹوئٹر پر شیئر کی تھی جس میں وہ ٹرین میں سفر کے دوران دروازے میں بیٹھے ہیں اور ساتھ گانا چل رہا ہے ’مسافر ہوں یارو، نہ گھر ہے نہ ٹھکانہ‘

 محکمہ ریلوے کے آفیشل اکاؤنٹ سے سونو سود کی ٹویٹ کو ری ٹویٹ کرتے ہوئے لکھا گیا ہے کہ ’ڈیئر سونو! آپ نہ صرف اس ملک بلکہ دنیا بھر کے کروڑوں افراد کے لیے رول ماڈل کی حیثیت رکھتے ہیں۔ سفر کے دوران ٹرین کے دروازے یا سیڑھیوں پر بیٹھنا بہت خطرناک ہے اور آپ نے اپنے فینز کے لیے جو ویڈیو جاری کی ہے وہ غلط پیغام دیتی ہے۔‘

ٹویٹ میں مزید لکھا گیا ہے کہ ’براہ مہربانی ایسا نہ کریں اور آرام دہ اور پرسکون سفر کا لطف اٹھائیں۔‘

بات صرف ریلوے کی ہدایات تک محدود نہیں رہی بلکہ ممبئی ریلوے کی پولیس نے بھی اداکار کو خبردار کیا گیا ہے۔

’ایسی حرکتیں خطرناک ہیں۔ حقیقی زندگی میں اس قسم کے سٹنٹس سے گریز کریں۔‘

ریلوے پولیس کا مزید کہنا ہے کہ ’سیڑھیوں پر بیٹھ کر سفر فلموں میں تفریح کا باعث ہو سکتا ہے مگر حقیقی زندگی میں نہیں۔ آئیے تحفظ کے رولز کی پابندی کو یقینی بنائیں۔‘