’لاہور دا پاوا، فخر لاوا‘، پی ایس ایل کے پہلے ہی میچ میں فخر زمان کی ففٹی

پاکستان سپر لیگ (پی ایس ایل) کے آٹھویں سیزن کے پہلے میچ میں دفاعی چیمپیئنر لاہور قلندرز کی جانب سے سٹار بیٹر فخر زمان نے عمدہ بیٹنگ کی۔

قلندرز کی جانب سے اوپننگ کرنے والے فخر زمان نے 42 گیندوں پر 66 رنز سکور کیے جس میں پانچ چھکے اور تین چوکے شامل تھے۔

اننگز کے دوران فخر زمان کا سٹرائیک ریٹ 157 رہا جس کی مدد سے لاہور قلندرز نے پاور پلے میں 50 رنز بنائے۔

اس اننگز کے ساتھ فخر زمان پی ایس ایل میں دو ہزار رنز بنانے والے دوسرے کھلاڑی بھی بن گئے ہیں۔

انہوں نے لاہور قلندرز کے لیے 62 میچز کھیلتے ہوئے 2001 رنز بنائے ہیں۔

 اُن کے علاوہ پشاور زلمی کے کپتان بابر اعظم واحد بیٹر ہیں جنہوں نے پی ایس ایل کی تاریخ میں ابھی تک دو ہزار رنز بنائے ہیں۔

فخر زمان کی پی ایس ایل کے اوپننگ میچ میں کارکردگی کے بارے میں سماجی رابطوں کی ویب سائٹ ٹوئٹر پر ان کے مداح خوشی کا اظہار کر رہے ہیں۔

عاطف نواز نے اپنی ٹویٹ میں لکھا کہ ’موت، ٹیکس اور فخر زمان کا لاہور قلندرز کے لیے ففٹی بنانا یقینی ہے۔ یہ 32 گیندوں پر بہترین ففٹی ہے جو آپ نے دیکھی ہے۔ چیمپیئنز کو یہاں سے اچھا سہارا مل گیا ہے۔‘

اسد نے مزاحیہ انداز میں لکھا کہ ’اِس پی ایس ایل میں فخر بھائی بہت قاتل مُوڈ میں نظر آئے ہیں۔‘

امیر حضرت نے مشہور مِیم کو فخر کے لیے استعمال کرتے ہوئے لکھا کہ ’لاہور دا پاوا، فخر لاوا۔ یہ اُن کی لیگ ہے۔ وہ پی ایس ایل کے مالک ہیں۔‘

شفقت شبیر نے ٹویٹ میں لکھا کہ ’جب فخر گیند کو مارتے ہیں تو اس بات کو یقینی بناتے ہیں کہ گیند باؤنڈری سے باہر جائے۔‘

عینی نے جذباتی انداز میں کہا کہ ’صرف اللہ جانتا ہے کہ میں نے فخر زمان کی بیٹنگ کو کتنا مِس کیا ہے۔‘