کیا فٹ بال سٹار لیونل میسی واپس بارسلونا جا رہے ہیں؟

ارجنٹائن کے کپتان لیونل میسی کے والد اور ایجنٹ جورگے میسی کا کا کہنا ہے کہ انہیں نہیں لگتا کہ ان کا بیٹے ایک بار پھر ہسپانوی کلب بارسلونا میں کھیلے گا۔

ارجنٹائن کے 35 سالہ کھلاڑی لیونل میسی نے بارسلونا کو خیرباد کہہ کر 2021 میں فرانسیسی فٹ بال کلب پیرس سینٹ جرمین سے معاہدہ کیا تھا۔

جمعرات کو بارسلونا ایئرپورٹ پر رپورٹر سے بات کرتے ہوئے لیونل میسی کے والد کا کہنا تھا کہ ’میرا نہیں خیال کہ میسی بارسلونا واپس جائیں گے کیونکہ شرائط مناسب نہیں۔‘

جورگے میسی کے کا مزید کہنا تھا کہ ہسپانوی کلب کے صدر سے ان کی لیونل میسی کے حوالے سے کوئی بات نہیں ہوئی اور ان کے بیٹے کا ابھی پیرس سینٹ جرمین سے معاہدہ برقرار ہے۔

خیال رہے میسی کا پیرس سینٹ جرمین سے معاہدہ رواں سال کے وسط میں ختم ہو رہا ہے اور ارجنٹائن کے فٹ بالر کو اب تک نیا کنٹریکٹ نہیں دیا گیا ہے۔

پچھلے سال ارجنٹائن کو فٹبال ورلڈ کپ جتوانے والے کپتان لیونل میسی نے 13 سال کی عمر میں بارسلونا کو جوائن کیا تھا اور وہ ہسپانوی کلب کے ساتھ 35 ٹائٹلز بھی جیتے تھے۔

ہسپانوی کلب کے لیے انہوں نے اپنے پورے کیریئر میں 778 میچ کھیلے تھے جن میں ان کے مجموعی گول کی تعداد 672 تھی۔