کنگ فہد پل پر منگل کو دوسرے روز بھی اژدحام، گاڑیوں کی قطاریں

سعودی عرب اور بحرین کو سمندر کےراستے جوڑنے والے کنگ فہد پل پر منگل کو دوسرے روز بھی شدید اژدحام دیکھنے مں آیا۔ بحرین جانے والی گاڑیوں کی تا حد نظر لائن لگی ہوئی ہے۔

عاجل ویب کے مطابق کنگ فہد پل انتظامیہ امیگریشن اور کسٹم کارروائی زون کی توسیع کا کام کررہی ہے تاکہ زیادہ سے زیادہ افراد سفر کرسکیں۔ 

یاد رہے کہ کنگ فہد پل پر پیر کو بھی زبر دست رش دیکھنے میں آیا تھا۔ انتظامیہ رش کم کرنے کے لیے مسلسل کوششیں کررہی ہے۔

بحرین جانے والے روٹ پر گاڑیوں کی تعداد میں اضافے کے باعث سفر کا دورانیہ بارہ منٹ سے بڑھ کر ایک گھنٹہ آٹھ منٹ تک پہنچ گیا ہے۔

 سعودی عرب کے تعلیمی اداروں میں دوسرے سمسٹر کے اختتام ہر چھٹیوں کے باعث مسافروں کی تعداد میں اضافہ دیکھنے میں آیا ہے۔

 سنیچر کو ایک لاکھ 36 ہزار 458 افراد نے کنگ فہد پل عبور کیا تھا جو ایک ریکارڈ ہے۔ پل کی تعمیر سے اب تک اتنی بڑی تعداد میں مسافروں نے کبھی سفر نہیں کیا تھا۔

اس سے قبل 11جنوری 2020 کو ایک لاکھ 31 ہزار افراد نے پل عبور کیا تھا۔

چارمارچ کو چوبیس گھنٹے کے دوران کنگ فہد پل سے گزرنے والے مسافروں نے ایک ریکاڈ قائم کیا ہے۔ ایک گھنٹے میں پانچ ہزار اور ایک منٹ میں 94 افراد نے پل سے سفر کیا۔

واضح رہے کہ سعودی عرب اور بحرین کو جوڑنے والے کنگ فہد پل کی انتظامیہ نے امیگریشن اور کسٹم کارروائی زون میں توسیع کے منصوبے پر عملدرآمد شروع کیا ہے۔

 انتظامیہ کا کہنا ہے کہ یہ منصوبہ کئی مراحل میں مکمل کیا جائے گا ۔ پہلا مرحلہ تین ماہ میں مکمل ہوگا۔ دیگر مراحل کے کام ایک سال کے اندر نمٹائے جائیں گے۔

انتظامیہ نے بحرین سے سعودی عرب اور مملکت سے بحرین  جانے والے مسافروں سے کہا تھا کہ توسیعی منصوبے کے باعث ٹریفک کی روانی میں تعطل آسکتا ہے جس پر معذرت خواہ ہیں۔