سعودی عرب کے شاہ سلمان بن عبدالعزیز نے رمضان کی آمد پر سعودی عوام، مملکت میں مقیم تارکین وطن اور دنیا بھر کے مسلمانوں کے نام مبارکباد کا پیغام جاری کیا ہے۔
سرکاری خبر خبررساں ادارے ایس پی اے کے مطابق شاہی پیغام وزیر اطلاعات سلمان بن یوسف الدوسری نے ریڈیو اور ٹی وی پر پڑھ کر سنایا۔
اپنے پیغام میں شاہ سلمان بن عبدالعزیزنے رمضان کی مبارکباد دی انہوں نے تمام نعمتوں کےلیے خدا کا شکر ادا کیااور کہا کہ ’حرمین شریفین، عمرہ و حج زائرین کی خدمت ہمارے لیے انمول اعزاز ہے‘۔
انہوں نے اس عزم کا اظہار کیا کہ’ سعودی عرب زائرین کے آرام و راحت اور امن و سلامتی کے انتظامات میں کبھی کوئی کسر نہیں اٹھا رکھے گا’‘۔
’زائرین کے مملکت میں قدم رکھنے سے روانگی تک انہیں تمام خدمات فراہم کرتے رہنے کے لیے پرعزم ہیں‘۔
شاہ سلمان بن عبدالعزیز نے دنیا بھر کے مسلمانوں کے نام رمضان پیغام میں کہا کہ ’تمام لوگ رمضان میں زیادہ سے زیادہ اچھے کام کریں۔ رشتوں کا پاس کریں۔ اپنی اصلاح پر توجہ دیں‘۔
انہوں نے دعا کی کہ’ اللہ تعالی سعودی عرب سمیت دنیا بھر کو ہر آفت اور شر سے محفوظ رکھے‘۔
