خیبر پختونخوا اسمبلی کے الیکشن 8 اکتوبر کو، الیکشن کمیشن کا نوٹیفیکیشن

الیکشن کمیشن آف پاکستان نے خیبر پختونخوا اسمبلی کے الیکشن بھی آٹھ اکتوبر کو کرانے کا اعلان کیا ہے۔

الیکشن کمیشن کی جانب سے بدھ کی شب جاری نوٹیفیکیشن میں کہا گیا کہ ’خیبر پختونخوا اسمبلی 18 جنوری کو تحلیل ہوئی تھی۔ وہاں انتخابات کے لیے پولنگ آٹھ اکتوبر کو ہوگی‘۔

الیکشن کمیشن کے مطابق’ آٹھ اکتوبر کی تاریخ صوبے کے گورنر کی جانب سے دی گئی ہے۔ الیکشن شیڈول کا اعلان وقت کے مطابق کر دیا جائے گا‘۔

 اس سے قبل الیکشن کمیشن نے پنجاب اسمبلی کے انتخابات ملتوی کرکے آٹھ اکتوبر کو الیکشن کی تاریخ مقرر کی تھی۔

الیکشن کمیشن نے اپنے حکم نامے میں کہا تھا کہ ’قانون نافذ کرنے والے اداروں، وزارت خزانہ، وزارت دفاع، وزارت داخلہ اور چیف سیکریٹری پنجاب کی جانب سے جمع کرائی گئی رپورٹس کی روشنی میں کمیشن اس نتیجے پر پہنچا ہے کہ الیکشن کا شفاف، منصفانہ، دیانتداری سے، پرامن اور قانون اور آئین کے مطابق انعقاد ممکن نہیں‘۔

یاد رہے کہ سپریم کورٹ کے حکم پر پنجاب اسمبلی کے انتخابات کےلیے صدر نے 30 اپریل کی تاریخ مقرر کی تھی جس کے بعد الیکشن شیڈول بھی جاری کیا گیا تھا۔

سپریم کورٹ نے خیبر پختونخوا اسمبلی کے الیکشن کی تاریخ متعین کرنے کا اختیار گورنر کو دیا تھا۔