’جوان‘ کا ٹریلر ریلیز، ’یہ دو رُوپ تھیٹر میں تباہی مچا دیں گے‘

بالی وُڈ کنگ شاہ رخ خان کی نئی فلم ’جوان‘ کا ٹریلر ریلیز کر دیا گیا ہے۔

’جوان‘ کا ٹریلر پیر کی صبح یوٹیوب پر ریلیز کیا گیا جسے چند ہی گھنٹوں میں ایک کروڑ کے قریب افراد دیکھ چکے ہیں۔

ایکشن، تھرلر اور ڈائیلاگز سے بھرپور فلم کے ٹریلر میں شاہ رخ خان کو چار مختلف رُوپوں میں دیکھا جا سکتا ہے۔

ممکنہ طور پر شاہ رخ خان اپنے کیریئر میں پہلی مرتبہ پولیس آفیسر کا کردار بھی نبھائیں گے۔

سماجی رابطوں کی ویب سائٹ ٹوئٹر پر شاہ رخ خان نے ٹریلر شیئر کرتے ہوئے لکھا کہ ’میں کون ہوں، کون نہیں، جاننے کے لیے ریڈی۔‘

فلم کے ٹریلر میں شاہ رخ خان خوب ایکشن کرتے نظر آتے ہیں، جبکہ ٹریلر کے آخر میں اُنہیں 1962 میں ریلیز ہونے والی ہندی فلم ’بیس سال بعد‘ کے گانے ’بے قرار کر کے ہمیں یوں نہ جائیے‘ پر مزاحیہ انداز میں ٹرین کے اندر ڈانس کرتے ہوئے بھی دیکھا جا سکتا ہے۔

’جوان‘ کے ٹریلر میں کنگ خان کے علاوہ جنوبی انڈیا کے اداکار وِجے سیتھوپاتھی، اداکارہ نائنتھرا، ثانیہ ملہوترا، پرِیا مانی اور سنیل گرووَر کو دیکھا گیا ہے، جبکہ فلم میں بالی وُڈ کی سٹار ادکارہ دپیکا پاڈوکون بھی خصوصی کیمیو کرتی نظر آئیں گی۔

ایٹلی کمار کی ہدایتکاری میں بننے والی ’جوان‘ سات ستمبر کو انڈیا سمیت دنیا بھر کے سنیما گھروں کی زینت بنے گی۔

دوسری جانب ٹریلر کے ریلیز ہونے کے بعد ٹوئٹر پر کنگ خان کے مداحوں میں خوشی کی لہر دوڑ گئی ہے جس کے بعد ’جوان‘ کے تعریفی تبصروں کا سلسلہ جاری ہے۔

ٹوئٹر ہینڈل حمبلی نے اپنی ٹویٹ میں لکھا کہ ’یہ دو رُوپ تھیٹر میں تباہی مچا دیں گے۔‘

ڈاکٹر نِیمو یادو تبصرہ کرتے ہوئے کہتے ہیں کہ ’نہ پروپیگنڈا فلمیں ہیں، نہ اِن میں مذہبی تفریق ہے، نہ کسی کے لیے نفرت ہے، نہ فحش ڈائیلاگ ہیں، نہ پی آر ہے۔ صرف دنیا کو محظوظ کرنے لیے خالص تفریح ہے۔ یہ ہیں شاہ رخ خان۔‘

ٹوئٹر ہیںڈل جسٹ اے فین نے اپنی ٹویٹ میں لکھا کہ ’انہوں نے جوان کو اِس وجہ سے ملتوی کیا تھا کہ بالی وُڈ کو بہترین وی ایف ایکس، ایکشن مناظر، کلر گریڈنگ اور عکس بندی دے سکیں۔ شاہ رخ خان الگ ہی مقام پر لے کر جا رہے ہیں۔ اِس شعبے میں ریڈ چلیز انٹرٹینمنٹ کا کوئی مقابلہ نہیں ہے۔‘