طائف میں اونٹ فیسٹول کا آغاز یکم اگست سے، 56.25 ملین ریال کے انعامات

سعودی ولی عہد شہزادہ محمد بن سلمان کی سرپرستی میں منگل یکم اگست 2023 کو اونٹ فیسٹیول ایڈیشن فائیو طائف کے کیمل سکوائر میں شروع ہوگا۔ 

سرکاری خبررساں ادارے ایس پی اے کے مطابق کیمل فیڈریشن نے اعلان کیا ہے کہ ’اونٹوں کی ریس میں فاتحین کو 56.25 ملین ریال کے انعامات دیے جائیں گے‘۔  

فیسٹیول کے دوران اونٹوں کے درمیان دوڑ کے 589 راؤنڈ ہوں گے۔ 

فیسٹول کا آغاز 350 راؤنڈ پر مشتمل ابتدائی ریس سے ہوگا۔ مقابلے کا سلسلہ بارہ اگست تک جاری رہے گا۔ 28 اگست کو 239 فائنل ریسوں کے ساتھ اختتام پذیر ہوگا۔ 

 اونٹ فیسٹیول کا مقصد اونٹ کی دوڑ کے ورثے کو منانا اور اسے سعودی،عرب اور اسلامی ثقافت کے حصے کے طور پر فروغ دینا ہے۔

 اس ایونٹ سے مملکت میں سیاحت اور معیشت کی سپورٹ اور ترقی میں بھی مدد ملے گی جو کمیونٹی کی شمولیت کی حوصلہ افزائی، قومی ورثے کو تقویت اور ملکی ثقافت کی گہرائی کی عکاسی کرتی ہے۔

اونٹ کی دوڑ قبل از اسلام کے دور سے جاری ہے۔ مضبوط ، تیز ترین اور خوبصورت ترین اونٹ تیار کرنے کا رواج آج بھی ہے۔

دوڑ میں حصہ لینے والے صحت مند اونٹ ایک گھنٹہ میں 40 کلومیٹر تک دوڑ سکتے ہیں اور انہیں صحرا میں بہت زیادہ پانی کی بھی ضرورت نہیں ہوتی۔