کیا جیمز کیمرون تباہ ہونے والی آبدوز ’ٹائٹن‘ پر فلم بنا رہے ہیں؟

ہالی وڈ کے مشہور ترین فلمساز جمیز کیمرون نے پچھلے مہینے جون میں بحر اوقیانوس کی گہرائی میں تباہ ہونے والی آبدوز ’ٹائٹن‘ کی کہانی پر مبنی فلم بنانے کی افواہوں کی تردید کردی ہے۔

خیال رہے آبدوز ’ٹائٹن‘ میں جو کہ پچھلے ماہ سمندر کی گہرائی میں تباہ ہوئی تھی میں دو پاکستانیوں سمیت پانچ افراد سوار تھے جو کہ بحر اوقیانوس میں غرق ہونے والے جہاز ’ٹائیٹینک‘ کا ملبہ دیکھنے گئے تھے۔

جمیز کیمرون ہالی وڈ کی مشہور ترین فلموں میں سے ایک فلم ’ٹائیٹینک‘ کے ڈائریکٹر ہیں اور آبدوز ’ٹائٹن‘ کے تباہ ہونے کے بعد انہوں نے آبدوز کی مالک کمپنی ’اوشن گیٹ‘ کی کارکردگی پر سوالات اٹھائے تھے اور حادثے پر افسوس کا اظہار بھی کیا تھا۔

ان کا بیان سامنے آنے کا بعد میڈیا اور سوشل میڈیا میں یہ افواہیں آنا شروع ہوگئی تھی کہ شاید ہالی وڈ کے فلمساز ’ٹائیٹینک‘ کے بعد اب آبدوز ’ٹائٹن‘ کی کہانی پر مبنی بھی فلم بنا رہے ہیں۔

جیمر کیمرون نے اپنے سوشل میڈیا اکاؤٹنس سے ان افواہوں کی تردید کرتے ہوئے کہا ہے کہ ’میں عام طور پر میڈیا میں گردش کرنے والی ہتک آمیز افواہوں کا جواب نہیں دیتا لیکن اب مجھے دینا پڑے گا۔‘

انہوں نے وضاحت کی کہ ’میں اوشن گیٹ (آبدوز) پر فلم بنانے پر کسی سے بات نہیں کر رہا اور نہ کبھی کروں گا۔‘

خیال رہے ’ٹائٹن‘ نامی آبدوز 18 جون کو لاپتہ ہوئی تھی اور 22 جون امریکہ اور کینیڈا کی ریسکیو ٹیموں نے اس بات کا اعلان کیا تھا کہ یہ آبدوز تباہ ہو چکی ہے اور اس کا ملبہ بھی مل چکا ہے۔

یہ ملبہ شمالی بحر اوقیانوس کی سطح سے 12 ہزار فٹ نیچے سے اٹھایا گیا تھا۔