’نام بدنام، پتہ قبرستان،‘ دہلی میں 18 سالہ نوجوان کا گینگ ’دہشت کی علامت‘

انڈیا کے دارالحکومت نئی دہلی میں پولیس نے ایمیزون کے ایک سینیئر مینیجر کے قتل کے الزام میں دو نوجوانوں کو گرفتار کرلیا ہے جو کہ ’مایا گینگ‘ کا حصہ ہیں۔

’این ڈی ٹی وی‘ کے مطابق گرفتار ہونے والے ایک نوجوان کا نام محمد سمیر عرف مایا ہے اور اس 18 برس کے لڑکے کے نام پر ہی ’مایا گینگ‘ کا نام رکھا گیا ہے۔

خیال رہے کہ منگل کو نئی دہلی کی سڑک پر ایمیزون کے سینیئر مینیجر کو بحث کے بعد کچھ موٹرسائیکل سواروں نے گولی مار کر قتل کر دیا تھا جبکہ ان کے انکل گووند اس حملے میں زخمی ہوئے تھے۔

گرفتار کیے گئے نوجوان محمد سمیر عرف مایا کے خلاف قتل کے چار مقدمات درج ہیں اور وہ ویڈیو اور فوٹو شیئرنگ پلیٹ فارم پر بھی کافی متحرک تھے۔

انڈین چینل کی رپورٹ کے مطابق مایا کے انسٹاگرام اکاؤنٹ پر انہوں نے اپنے بارے میں لکھا کہ ’نام بدنام، پتہ قبرستان، عمر جینے کی اور شوق مرنے کا۔‘

ملزم کے انسٹاگرام اکاؤنٹ پر ریلیز بھی موجود ہیں جس میں وہ متعدد فلموں کے ڈائیلاگ بولتے ہوئے دیکھا جا سکتا ہے اور کئی ویڈیوز میں ان کے ہاتھ میں ہتھیار بھی دیکھے جا سکتے ہیں۔

واضح رہے کہ 2007 میں انڈیا میں بننے والی فلم ’شوٹ آؤٹ ایٹ لوکھنڈ والا‘ میں وویک اوبرائے نے مایا نامی ایک گینگسٹر کا کردار ادا کیا تھا اور خیال ظاہر کیا جا رہا ہے کہ محمد سمیر عرف مایا شاید اسی فلم سے متاثر تھے۔

انسٹاگرام پر متعدد ویڈیوز میں محمد سمیر عرف مایا کے ساتھ دیگر نوجوانوں کو بھی دیکھا جاسکتا ہے۔ پولیس کا کہنا ہے کہ یہ نوجوانوں کا کوئی ایسا گروہ نہیں جسے صرف ’شوبازی‘ کا شوق ہو بلکہ اس گروہ نے شمال مشرقی دہلی میں دہشت پھیلا رکھی ہے۔

پولیس کا مزید کہنا ہے کہ انہوں نے ایمیزون کے مینیجر کے قتل کے الزام میں محمد سمیر کے ساتھی بلال غنی کو بھی گرفتار کیا ہے جبکہ ان کے ساتھی ملزمان کی گرفتاری کے لیے چھاپے بھی مارے جا رہے ہیں۔

پولیس کے مطابق محمد سمیر عرف مایا قتل کے چار مقدمات میں نامزد ہیں جبکہ ان کا ایک ساتھی ڈکیتی اور ایک قتل میں ملوث رہا ہے۔