کوہستانی علاقے میں بھٹک جانے والے معمر شہری کی نعش مل گئی 

سعودی عرب کے الشرقیہ ریجن کے کوہستانی علاقے میں راستہ بھول جانے والے معمر شہری کی نعش جبیل سے 35 کلو میٹر دور الفاضلی کے علاقے میں مل گئی۔ 

عکاظ اخبار کے مطابق فلاحی انجمن فرسان کے ایگزیکٹیو ڈائریکٹرعادل القحطانی نے بتایا ایک روز قبل اطلاع ملی تھی کہ 82 سالہ معمر شہری کوہستانی علاقے میں لاپتہ ہوگئے ہیں۔

لاپتہ ہونے والے معمر شہری عمر سراج الدین کا تعلق جبیل انڈسٹریل سٹی سے تھا۔ 

عادل القحطانی نے بتایا اطلاع  ملتے ہی تلاش کےلیے ٹیم تشکیل دی گئی۔ ابتدا میں عمر سراج الدین کی گاڑی نظر آئی۔ اس کے بیس منٹ بعد نعش کوہستانی علاقے سے مل گئی۔ 

فلاحی انجمن نے بزرگ شہری کی تلاش میں مدد کرنے والے رضاکاروں،اہلکاروں، ہلال احمر کے کارکنان اور فوجداری جرائم کے سراغرسانوں کا شکریہ ادا کیا۔