نیوزی لینڈ اور سری لنکا کے میچ میں بارش کا امکان، ’قدرت کا نظام‘ پاکستان کی طرف؟

نیوزی لینڈ اور سری لنکا کی ٹیمیں جمعرات کو ورلڈ کپ کے ایک اہم میچ میں بنگلورو کے چنا سوامی سٹیڈیم میں مدمقابل آئیں گی۔

پوائنٹس ٹیبل پر اس وقت نیوزی لینڈ، پاکستان اور افغانستان کے آٹھ، آٹھ پوائنٹس ہیں لیکن کیویز نیٹ رن ریٹ اچھا ہونے کے سبب پوائنٹس ٹیبل پر گرین شرٹس اور افغانستان سے اوپر ہیں۔

نیوزی لینڈ کو سیمی فائنل میں پہنچنے کی امیدیں برقرار رکھنے کے لیے سری لنکا کو لازمی ہرانا ہوگا لیکن بنگلورو کا موسم اُن کی راہ میں ایک بڑی رُکاوٹ ثابت ہو سکتا ہے۔

انڈین میڈیا کے مطابق آج (بدھ) بھی بنگلور کے متعدد علاقوں میں موسلادھار بارش ہوتی رہی ہے اور جمعرات کو بھی محکمہ موسمیات نے بارش کی پیش گوئی کر رکھی ہے۔

’ٹائمز ناؤ‘ کے مطابق سری لنکا اور نیوزی لینڈ کے میچ کے دوران بنگلورو میں تیز بارش کے 90 فیصد امکانات موجود ہیں۔

اگر سری لنکا اور نیوزی لینڈ کے درمیان میچ بارش کے سبب بے نتیجہ ختم ہوتا ہے تو دونوں ٹیموں کے حصے میں ایک، ایک پوائنٹ آئے گا جس کے بعد نیوزی لینڈ کے 9 پوائنٹس ہوجائیں گے اور ٹیم کے سیمی فائنل میں پہنچنے کے امکانات بالکل ختم ہوجائیں گے۔

اس صورت میں پاکستان کو 11 نومبر کو انگلینڈ کی ٹیم کو لازمی شکست دینا ہوگی جس کے بعد اس کے 10 پوائنٹس ہوجائیں گے اور سیمی فائنل تک پہنچنے کے امکانات بڑھ جائیں گے۔

ورلڈ کپ ایک اور اہم میچ 10 نومبر کو افغانستان اور جنوبی افریقہ کے درمیان ہوگا۔ افغانستان کے آٹھ پوائنٹس ضرور ہیں لیکن ان کا نیٹ رن ریٹ پاکستان کے مقابلے میں کافی کم ہے۔

اگر افغانستان جنوبی افریقہ کے خلاف میچ جیت بھی جاتا ہے تو نیٹ رن ریٹ اچھا ہونے کے سبب پاکستان کی ٹیم انگلینڈ کو شکست دے کر سیمی فائنل تک رسائی حاصل کر سکتی ہے۔

سوشل میڈیا پر بھی نیوزی لینڈ اور سری لنکا کے درمیان میچ سے زیادہ اس وقت بنگلورو کا موسم موضوعِ گفتگو بنا ہوا ہے۔

ایک صارف نے اپنی پوسٹ میں لکھا کہ ’کل کون جیتے گا؟ سری لنکا، نیوزی لینڈ یا قدرت کا نظام۔‘

سوشل میڈیا پر شیئر ہونے والی ویڈیوز میں بنگلورو شہر کی زیرِ آب سڑکیں دیکھی جا سکتی ہیں۔

سوشل میڈیا صارفین کی ایک بڑی تعداد ایسی بھی ہے جو بارش کی دعا اس لیے کر رہی ہے تاکہ انہیں سیمی فائنل میں پاکستان اور انڈیا کا میچ دیکھنے کو مل سکے۔

خیال رہے انڈیا، آسٹریلیا اور جنوبی افریقہ کی ٹیمیں پہلے ہی ورلڈ کپ کے سیمی فائنل میں پہنچ چکی ہیں۔