خلا میں جانور بھیجنے کا مقصد انسانی مشن کی تیاری ہے: ایران

ایران نے جانوروں کو لے کر جانے والا کیپسول مدار میں بھیجا ہے جس کا مقصد آئندہ برسوں میں خلا میں انسانی مشن بھیجنے کی تیاری ہے۔

عرب نیوز کے مطابق ایران کی نیوز ایجنسی ارنا کی رپورٹ میں ٹیلی کمیونیکیشن کے وزیر عیسی زارع پور کے حوالے سے بتایا گیا ہے کہ کیپسول کو 130 کلومیٹر (80 میل) کے فاصلے پر مدار میں چھوڑا گیا ہے۔

عیسیٰ زارع پور نے کہا کہ 500 کلوگرام (1,000 پاؤنڈ) کیپسول کے اجراء کا مقصد آنے والے برسوں میں ایرانی خلابازوں کو خلا میں بھیجنا ہے۔

وزیر مواصلات نے یہ نہیں بتایا کہ کیپسول میں کس قسم کے جانور مدار میں بھیجے گئے ہیں۔

ایران کے سرکاری ٹیلی ویژن نے سلمان نامی راکٹ کی فوٹیج دکھائی ہے جس کے ذریعے ایک کیپسول کو خلا میں بھیجا جا رہا ہے۔

قبل ازیں ایران مختلف سیٹلائٹ اور دیگر قسم کے خلائی راکٹس کو کامیابی سے مدار میں بھیجنے کا اعلان کرتا رہا ہے۔

ایران کی جانب سے ستمبر میں کہا گیا تھا کہ ڈیٹا اکٹھا کرنے والا سیٹلائٹ خلا میں بھیجا ہے۔

ایران نے 2013 میں ایک بندر خلا میں بھیجنے اور کامیابی سے واپس  لانے کا بھی اعلان کیا تھا۔

ایران کا کہنا ہے کہ سائنسی تحقیق اور دیگر قسم کی عوامی سہولیات کو مدنظر رکھتے ہوئے ہمارا سیٹلائٹ پروگرام جاری ہے۔

دوسری جانب امریکہ اور دیگر مغربی ممالک طویل عرصے سے ایران کے سیٹلائٹ پروگرام کو مشکوک قرار دے رہے ہیں۔ 

ان کا کہنا ہے کہ یہ ٹیکنالوجی طویل فاصلے تک مار کرنے والے میزائل بنانے کے لیے استعمال کی جا سکتی ہے۔