دہشتگردی سے نمٹنے کیلئے مملکت کاساتھ دیں، علما

مکہ مکرمہ ..... عالم اسلام کے قائدین ، دانشوروں اور مسلم مسائل و احوال کے ماہرین نے مطالبہ کیا ہے کہ دنیا بھر کے مسلمان دہشتگردی اور انتہا پسندی سے نمٹنے کے مشن میں سعودی عرب کا ساتھ دیں۔انتہا پسندی کے خلاف جنگ میں سعودی عرب سے تعاون کریں۔ یہ مطالبہ 16،17رمضان المبارک کو مکہ مکرمہ میں رابطہ عالم اسلامی کے زیر اہتمام عالمی سیمینار کے شرکا ءنے اختتامی اعلامیہ جاری کرکے کیا۔سیمینار کا عنوان تھا غیر مسلم ممالک میں مسلم اقلیتیں ، حقوق و فرائض،500اسلامی اداروں کی سیمینار میں نمائندگی ہوئی۔ شرکاءنے اسلامی امریکی سربراہ کانفرنس کے نتائج پر اعتماد کا اظہار کرتے ہوئے کہا کہ مسلم اقلیتوں کے امور و مسائل اور انکی ریاستوں کے ساتھ انکے تعلقات کی نوعیت پر کوئی مداخلت نہ کرے۔مسلم اقلیتوں کو اپنے حال و مستقبل کا فیصلہ اپنے قائدین پر چھوڑ دیا جائے۔ شرکاءنے سفارش کی کہ دہشتگردی اور انتہا پسندی پھیلانے والا افکار سے نمٹنے کیلئے تمام ادارے ایک دوسرے سے تعاون کریں۔ رابطہ عالم اسلامی ، مسلم اقلیتوں کیلئے آن لائن آگہی مہم کا اہتمام کریں۔ مغربی ممالک میں قائم اسلامی ادارے اسلامی اتحاد اور انسیت پر اثر انداز اختلافات اور تصورات سے پرہیز کریں۔ مسلم اقلیتوں کو سیاسی اسلام کی علمبردار جماعتوں کی آویزشوں سے بچائیں۔ فرقہ واریت اور مسلکی تعصبات بھڑکانے والوں سے اجتناب برتیں اور برتوائیں۔غیر مسلم ممالک میں مسلمانوں کے پرسنل لا کے احترام کا مطالبہ قانون کے دائرے میں کیا جائے۔ مذہبی شعائر کی آزادی پر توجہ مرکوز کیجائے۔ حجاب، مساجد کی تعمیر اور اسلامی مدارس کے قیام کے حق کے لئے پرامن طریقے سے کام کیا جائے۔شرکاءنے رابطہ عالم اسلامی سے مسلم اقلیتوں کے ساتھ ربط و ضبط پیدا کرنےوالے عالمی مرکز کے قیام کا مطالبہ کیا۔