او آئی سی کا 15واں سربراہی اجلاس، نائب وزیراعظم اسحاق ڈار گیمبیا پہنچ گئے

نائب وزیراعظم اسحاق ڈار او آئی سی کے 15ویں سربراہی اجلاس میں شرکت کے لیے گیمبیا کے شہر بنجول پہنچ گئے۔

ہوائی اڈے پر ان کا استقبال گیمبیا کے وزیر پٹرولیم اور توانائی نانی جوارا نے کیا۔

سرکاری خبر رساں ایجنسی اے پی پی کے مطابق نائب وزیر اعظم اور وزیر خارجہ اسحاق ڈار 4 اور 5 مئی کو گیمبیا کے شہر بانجول میں اسلامی ممالک کی تنظیم (او آئی سی ) کے 15ویں سربراہی اجلاس میں پاکستانی وفد کی قیادت کریں گے۔

دفتر خارجہ کی جانب سے بدھ کو جاری بیان کے مطابق نائب وزیراعظم اور وزیر خارجہ اسحاق ڈار 2 اور 3 مئی کو او آئی سی کونسل آف فارن منسٹرز کے اجلاس میں بھی شرکت کریں گے جس میں سربراہی اجلاس کے ایجنڈے کو حتمی شکل دی جائے گی۔

بیان کے مطابق ’یہ اجلاس مسلم امہ کے لیے ایسے مشکل وقت میں ہورہا ہے جب غزہ کے عوام مسلسل حالت جنگ میں ہیں ۔سربراہ اجلاس کے موقع پر نائب وزیر اعظم اسحاق ڈار غزہ میں حالیہ نسل کشی، جموں وکشمیر میں بنیادی حق خودارادیت ،مسلم امہ کے اتحاد و یکجہتی،اسلامو فوبیا میں اضافے، دہشت گردی اور عالمی چیلنجوں بارے پاکستان کا موقف پیش کریں گے۔‘

اجلاس کے موقع پر نائب وزیر اعظم اور وزیر خارجہ اجلاس میں شریک سربراہان اور وزرائے خارجہ سے ملاقاتیں بھی کریں گے۔