سعودی ولی عہد کا دورۂ پاکستان مئی میں ’کسی بھی وقت‘ متوقع ہے: وزیرِ خارجہ اسحاق ڈار

پاکستان کے نائب وزیراعظم اور وزیر خارجہ اسحاق ڈار نے کہا ہے کہ سعودی عرب کے ولی عہد شہزادہ محمد بن سلمان کا دورہ پاکستان جلد متوقع ہے اور وہ مئی کے مہینے میں کبھی بھی اسلام آباد آ سکتے ہیں۔

عرب نیوز کے مطابق وزیر خارجہ اسحاق ڈار نے اسلام آباد میں صحافیوں کو بریفنگ کے دوران بتایا کہ سعودی ولی عہد کے دورے کے حوالے سے ’حتمی تاریخیں ہمیں وہاں (سعودی عرب) سے موصول ہوں گی۔ وزارت خارجہ میں ہم ان کے ساتھ رابطے میں ہیں اور فی الحال جلد ان کے دورے کا امکان ہے۔‘

اسحاق ڈار کے مطابق رمضان کے مہینے میں وزیراعظم شہباز شریف سے ملاقات کے دوران ولی عہد شہزادہ محمد بن سلمان نے دورے کی دعوت قبول کی تھی۔

وزیر خارجہ نے مزید کہا کہ ’انہوں (سعودی ولی عہد) نے کہا تھا کہ وہ گورنمنٹ ٹو گورنمنٹ (جی ٹو جی) اوربزنس ٹو بزنس (بی ٹو بی) کے ابتدائی اجلاسوں کے بعد پاکستان کا دورہ کریں گے۔‘

اسحاق ڈار کا یہ بیان دونوں ممالک کے درمیان اعلٰی سطح پر ہونے والی ملاقاتوں کے بعد سامنے آیا ہے۔ شہباز شریف نے وزیراعظم کا منصب سنبھالنے کے بعد سعودی عرب کا دورہ کیا تھا، جس کے بعد سعودی وزیر خارجہ شہزادہ فیصل بن فرحان بھی پاکستان آئے تھے۔

دوسری جانب امریکی محکمہ خارجہ کے ترجمان میتھیو ملر نے پریس بریفنگ کے دوران کہا ہے کہ واشنگٹن سعودی ولی عہد کے متوقع دورہ پاکستان کی حمایت کرتا ہے اور ہم اپنے شراکت داروں کے درمیان رابطوں کی ہمیشہ حوصلہ افزائی کرتے ہیں۔

حالیہ چند ہفتوں سے پاکستان اور سعودی عرب دو طرفہ تجارت اور سرمایہ کاری کے فروغ کے لیے مل کر کام کر رہے ہیں۔ گزشتہ ماہ ولی عہد شہزادہ محمد بن سلمان نے مملکت کی جانب سے پاکستان کے لیے 5 ارب ڈالر کی سرمایہ کاری کے پیکچ کے مرحلے کو تیز کرنے کے عزم کا اعادہ کیا تھا۔

وزیر خارجہ اسحاق ڈار کے مطابق وزیر اعظم شہباز شریف نے اپریل میں سعودی عرب کے دورے کے دوران ولی عہد سے ملاقات میں دوطرفہ تجارت اور سرمایہ کاری میں اضافے پر بات چیت کی تھی۔